कोशी प्रदेशमा बाढी, पहिरो र डुबानको जोखिम कायमै

काठमाडौं । कोशी प्रदेशमा अहिले भारी वर्षा भइरहेको छ । दिनभर झरी पर्ने छ भने भोलि पनि वर्षाको सम्भावना रहेको छ । कोशी केन्द्रित भएको पानी पार्ने यो बादल पश्चिमतिर सर्ने क्रममा देखिएको छ । यसको प्रभाव मधेश, बागमती र गण्डकी प्रदेशसम्म पर्न सक्ने मौसमविदको भनाइ छ ।

असोज १० गतेदेखि १२ गतेसम्म परेको अविरल वर्षाले जमिन कमजोर भएका स्थानमा अहिलेको वर्षाले पहिरो जाने र क्षति पुर्‍याउन सक्ने सम्भावना भएकाले सावधानी अपनाउन सुझाव दिइएको छ ।जल तथा मौसम विज्ञान विभागका अनुसार विगत एक घण्टाको अवधिमा सुनसरीको तरहरामा भारी वर्षा भएको छ । बिहान पौने आठ बजेसम्मको एक घण्टाको अवधिमा तरहरामा १३.४ मिलिमिटर वर्षा मापन भएको छ ।

२४ घण्टादेखि नै वर्षा भइरहेको छ । बाढी पूर्वानुमान महाशाखाले सर्दु, सुनसरी खोला, बुढी खोला, खेसलिया खोलालगायत अन्य स–साना खोलामा आकस्मिक बाढीको जोखिम भएकाले सतर्क रहन अनुरोध गरेको छ ।