तीन सय ९६ घण्टाको बैठकमा साढे ७ करोड स्वाम

काठमाडौं । संसद्का दुवै सदनका गरी ३ सय ९६ घण्टा चलेको आर्थिक वर्ष २०७९, ०८० को बैठकमा भत्ताबापत राज्यकोषबाट साढे ७ करोड रुपैयाँ खर्च भएको छ । प्रतिनिधिसभा २०७९ को प्रथम अधिवेशन १ सय १० दिन चालु रहेकोमा २९ दिनमा जम्मा २८ पटक बैठक बसेर उक्त भत्ता स्वाम पारिएको हो ।

दोस्रो अधिवेशन १ सय ८० दिन चालु रहेकोमा ६९ दिनमा ६५ पटक बैठक बसेको थियो । प्रतिनिधिसभा बैठक उक्त वर्ष कुल २ सय ९६ घण्टा ३० मिनेट बसेको थियो । राष्ट्रिय सभातर्फ १३औं अधिवेशन १ सय १० दिन चालु रहेकोमा १८ दिनमा १९ पटक र १४औं अधिवेशन १ सय ८० दिन चालु रहेकोमा ३९ दिनमा ४८ पटक बैठक बसेको थियो ।

कुल १ सय घण्टा ६ मिनेट बसेको पाइएको छ । यसरी प्रतिनिधिसभाको प्रथम र दोस्रो अधिवेशन र राष्ट्रिय सभाको १३औं र १४औं अधिवेशनको बैठक भत्ताबापत ७ करोड ५६ लाख रुपैयाँ खर्च भएको महालेखा परीक्षकको तथ्यांकमा उल्लेख छ ।