विवाहको नाटक गरेर बालिका बलात्कार

काठमाडौं । बालिका बलात्कार गरेको आरोपमा संखुवासभा प्रहरीले एक युवकलाई पक्राउ गरेको छ । तनहुँ भिमाद नगरपालिका– २ का ३७ बर्षिय हिमाल मगर भन्ने अभिमान सिं आले पक्राउ परेका हुन । खाँदबारीमा पत्रकार सम्मेलन मार्फत बलात्कारमा सम्लग्न भएको आरोपमा आलेमगरलाई सार्वजनिक गरेको हो ।

आरोपित आलेमगरले बिवाह गर्ने प्रलोभन देखाएर खाँदबारी स्थित एक होटलमा लगेर १५ वर्षीया बालिका बलात्कार गरेको जिल्ला प्रहरी कार्यालयले जनाएको छ । होटलमा बलात्कार गरेर भागेका आलेमगरलाई गत शनिबार ओखलढुंगाको सिद्दिचरण–११ रमाईलोबाट पक्राउ गरिएको जिल्ला प्रहरी कार्यालय संखुवासभाका प्रहरी निरिक्षक अशोक जबेगुले जानकारी दिए ।

परिवारजनले दिएको उजुरीको आधारमा आलेमगरलाई पक्राउ गरिएको प्रहरीले जनाएको छ । ती बालिकालाई एक साताअघि बलात्कार गरेको अनुसन्धानबाट खुल्न आएको छ । जिल्लामा ९ महिनामा ११ वटा बलात्कारका घटना भएको जिल्ला प्रहरी कार्यालयमा तथ्याङ्क छ । ०७७, ७८ मा २७ वटा बलात्कारका घटना भएका थिए ।