भक्तपुर अस्पतालको नवनिर्मित भवन उद्घाटन

भक्तपुर । बागमती प्रदेश सरकारले भक्तपुर अस्पतालको स्तरवृछि गर्न लागेको छ । कुनै समय रिफर सेन्टरका रुपमा रहेको अस्पताल यस वर्ष ९८ अंकसहित देशकै सर्वोत्कृष्ट घोषणा भएसंगै प्रदेश सरकारको ध्यान गएको हो । तीन सय शैयामा अस्पताल विकास गर्न लागेको र त्यसको तयारी स्वरुप आज बागमती प्रदेश स्वास्थ्य मन्त्री रामेश्वर श्रेष्ठ र बेलायती राजदूत रब फेनले नवनिर्मित भवनको उद्घाटन गरेका हुन ।

न्यूनतम सेवा मापदण्ड कार्यान्वयन मूल्याङ्कनमा ९८ % अङ्क प्राप्तगरी देशकै उत्कृष्ट अस्पताल बन्न सफल भएपछि प्रदेश सरकारले स्तरवृद्धि गर्न लागेको हो । स्वास्थ्य क्षेत्रमा जनतालाई सहज सेवा दिन र विरामीमैत्री अस्पताल बनाउँन स्वास्थ्यमन्त्री रामेश्वर श्रेष्ठले अस्पताल प्रशासनलाई निर्देशन दिए । मन्त्री श्रेष्ठले आवश्यक समन्वय गर्न प्रदेश सरकार तयार रहेको बताए ।

अस्पतालको नवनिर्मित अपरेशन थियटरको समुद्घाटन गर्दै नेपालका लागि बेलायती राजदूत महामहिम रब फेनले शिलालेश अनावरण गरी रिवन समेत काटे । सो अवसरमा बेलायती सरकारका तर्फबाट आफुले अस्पताललाई सहयोग गर्ने बताए । सो अवसरमा ३४ करोड लागतमा निर्मित अस्पतालको नवनिर्मित भवन संचालनमा आएपछि विगतभन्दा सेवामा धेरै सुधार गरेको मेडिकल सुपरिटेन्डेन्ट डा.सुमित्रा गौतमले बताइन् ।

अस्पतालले गुणस्तरीय सेवा विस्तार गरेसँगै विरामीको भीड हुन थालेको छ । राजदुत र स्वास्थ्य मन्त्रीलाई अस्पताल प्रशासनले मायाको चिनो प्रदान गरेको थियो । कार्यक्रममा प्रदेश साँसद, चिकित्सक, प्रमुख जिल्ला अधिकारी, विभिन्न संघ सस्थाका प्रतिनिधि, स्थानीय र पत्रकारको सहभागिता रहेको थियो ।