- २४ बैशाख २०८३, बिहीबार / May 7, 2026
काठमाडौं । हात्तीगौंडाबाट पक्राउ परेका कथित तपस्वी रामबहादुर बम्जन पुर्पक्षका लागि कारागार चलान भएका छन् । सर्लाहीमा कारागार नहुँदा उनलाई महोत्तरी कारागार लगिएको छ । जलेश्वर कारगारमा पुगेपछि उनले जीमखानाको माग गरेका छन् ।
बालयौन शोषण र व्यक्ति बेपत्ता बनाएको अभियोगमा पुर्पक्षको लागि जेल चलान भएका उनले कारागारमा जीमको सुविधा मागेका हुन् । बम्जन पक्राउ परेको घरभित्र जिमखाना नै खडा गरेको भेटिएको थियो । घरमा टप बाथसहितको नुहाउने ठाउँ र आरामदायी बेडरुम समेत थिए ।
बिहीबार जिल्ला अदालत सर्लाहीबाट पुर्पक्षका लागि महोत्तरीको जलेश्वर कारागार चलान भएका बम्जनले आफूले घरमा जिम गर्ने गरेको भन्दै जेलमा भए नभएको सोधेको कारगारका एक कर्मचारीले बताए । आफूले घरमा जीम गर्ने भनेको भन्दै उनले यहाँ जीम छैन भनेर सोधेका थिए ।
कारगार साँघुरो भएका कारण बिहान हिँडडुल गर्ने ठाउँ मात्र रहेको र कारागारको सुविधाबारे उनलाई जानकारी गराएको कारागार प्रशासने कर्मचारीले बताए । कारागारमा बम्जनसँगै अरू ५–७ जना जोगी कैदी रहेका छन् । बम्जनले आफूलाई सादा खाना माग गरेकाले अरू जोगीलाई बनाएको खाना दिने कारागारले जनाएको छ ।
बम्जन बिहीबार साँझ सवा सात बजे जलेश्वर कारागार पुगेका थिए । महोत्तरी कारागारमा पुरुष मात्र राखिएको छ । महिलालाई सिन्धुली कारागारमा राखिएको छ । कारागार साँघुरो भएकाले अरू धेरै सुविधा भने नरहेको कर्मचारीले बताएका छन् ।
