- १५ कार्तिक २०८३, आईतवार / Nov 1, 2026
बारा, २ असोज । बाराको जीतपुरसिमरा उपमहानगरपालिका–१९ इनर्वाशिरामा ५ वर्षीया बालिकामाथि बलात्कार गरेको आरोपमा एक व्यक्ति पक्राउ परेका छन् ।
पक्राउ पर्नेमा सोही गाउँका करिब ६५ वर्षीय असम्जान मियाँ रहेको प्रहरीले जनाएको छ । बालिकामाथि पटक–पटक बलात्कार गरेको आरोपमा उनलाई प्रहरीले पक्राउ गरेको हो ।
पक्राउ परेका मियाँलाई इलाका प्रहरी कार्यालय सिमराको हिरासतमा राखिएको छ । प्रहरीले घटनाबारे कानुनी प्रक्रियाअनुसार अनुसन्धान अघि बढाएको जनाएको छ ।
आरोपीलाई पक्राउ गरी प्रहरी चौकीमा ल्याएपछि आक्रोशित स्थानीयले राति प्रहरी चौकी घेराउ गरेका थिए । उनीहरूले आरोपितमाथि कडा कानुनी कारबाही गर्न माग गर्दै प्रदर्शनसमेत गरेका थिए ।
राति करिब ९ः२० बजेपछि प्रहरी चौकी आसपासको अवस्था तनावपूर्ण बनेको थियो । स्थानीयले आरोपितलाई आफ्नो जिम्मा लगाउनुपर्ने मागसमेत गरेका थिए । प्रहरीले भने आरोपितलाई नियन्त्रणमै राखेर घटनाको अनुसन्धान भइरहेको जनाएको छ ।
घटनापछि इनर्वाशिरा क्षेत्रमा सुरक्षा व्यवस्था कडा पारिएको छ । घटनाबारे थप अनुसन्धान भइरहेको जिल्ला प्रहरी कार्यालय बाराले जनाएको छ ।
