- २ आश्विन २०८३, शुक्रबार / Sep 18, 2026
एजेन्सी, २ असोज । अमेरिकाले इरानका राष्ट्रपति मसुद पेजेस्कियन र विदेशमन्त्री अब्बास अराघचीलाई संयुक्त राष्ट्रसंघको महासभामा सहभागी हुन भिसा दिने भएको छ ।
अमेरिका र इरानबीचको युद्ध सातौँ महिनामा प्रवेश गर्न लागेका बेला इरानी उच्च अधिकारीलाई महासभामा सहभागी हुन अनुमति दिने अमेरिकी निर्णय सार्वजनिक भएको हो । बीबीसीका अनुसार उनीहरूलाई महासभामा सहभागी हुन भिसा उपलब्ध गराइनेछ ।
यद्यपि इरानी प्रतिनिधिमण्डलमाथि अमेरिकाभित्र आवतजावतसम्बन्धी केही प्रतिबन्ध भने कायम रहनेछन् । अमेरिकी विदेश मन्त्रालयका अनुसार उनीहरूलाई विलासी तथा अन्य अमेरिकी सामान खरिद गर्नसमेत रोक लगाइनेछ । यसअघि गत वर्ष पनि अमेरिकाले इरानी कूटनीतिज्ञमाथि विभिन्न प्रकारका खरिद प्रतिबन्ध लगाएको थियो ।
अमेरिका र इरानबीच जारी द्वन्द्वको प्रभाव विश्वव्यापी ऊर्जा बजारमा समेत परेको बताइएको छ । द्वन्द्वको असर इरानका छिमेकी मुलुकसम्म फैलिएको अवस्थामा युद्ध अन्त्य गर्न अमेरिकी राष्ट्रपति डोनाल्ड ट्रम्पमाथि घरेलु तथा अन्तर्राष्ट्रिय दबाबसमेत बढिरहेको छ ।
संयुक्त राष्ट्रसंघको ८१औँ महासभाअन्तर्गत उच्चस्तरीय छलफल आगामी मंगलबारदेखि सुरु हुँदैछ । महासभामा अमेरिकी राष्ट्रपति डोनाल्ड ट्रम्प, बेलायतका प्रधानमन्त्री एन्डी बर्नहम र फ्रान्सका राष्ट्रपति इमानुएल म्याक्रोँलगायत विभिन्न देशका नेताले सम्बोधन गर्ने कार्यक्रम रहेको छ ।
आगामी बुधबार युक्रेन, सिरिया र इरानका नेताले सम्बोधन गर्ने अपेक्षा गरिएको छ । यसैबीच, अमेरिकाले प्यालेस्टिनी राष्ट्रपति महमुद अब्बास र प्यालेस्टिनी प्रतिनिधिमण्डललाई भने संयुक्त राष्ट्रसंघको महासभामा सहभागी हुन भिसा नदिएको बीबीसीले जनाएको छ ।
महासभामा सहभागी हुन इरानी अधिकारीलाई भिसा दिने अमेरिकी निर्णय अमेरिका–इरान तनावकै बीच आएको हो । यसले दुई देशबीचको कूटनीतिक सम्बन्ध र अन्तर्राष्ट्रिय मञ्चमा हुने संवादलाई समेत चर्चामा ल्याएको छ ।
