आज चेपाङ समुदायको न्वागी खाने पर्व

काठमाडौं । चेपाङ समुदायले आज न्वागी खाने पर्व मनाउँदै छन् । राष्ट्रिय पर्वका रूपमा हरेक वर्ष भदौ २२ मा छोनाम मनाउने चलन छ । यो पर्वलाई चेपाङ समुदायले नयाँ अन्न खान शुरु गर्ने दिनका रूपमा लिइन्छ ।

पितृलाई नचढाई र पूजा नगरी नयाँ फलफूल र अन्नपात खान हुँदैन भन्ने मान्यताअनुरूप यो दिन घैया धानको चामल, काउनो, पिँडालुलगायत अन्न र फलफूल पितृलाई चढाइन्छ। भदौ २२ गते सामूहिकरूपमा मनाइए पनि कुलअनुसार भदौको पूर्णिमादेखि महिनाभर न्वागी मनाउने परम्परा छ।

न्वागीमा चेपाङ झाँक्रीले ढ्याङ्रो ठोक्दै कुखुराको बलि चढाउँछन् । यो दिन कुनै काम नगरी रमाइलो गर्ने चलन छ । कुटुम्बलाई पनि निम्तो गरेर सामूहिक भोज खुवाइन्छ । विगतमा जस्तै यो वर्ष पनि सामूहिक रूपमा छोनाम पर्व मनाउन लागेको नेपाल चेपाङ संघका केन्द्रीय अध्यक्ष गोविन्दराम चेपाङले बताए।