- २२ असार २०८३, सोमबार / Jul 6, 2026
काठमाडौं । कर्णाली राजमार्गमा नौ वर्ष यता भएका सडक दुर्घटनामा ९९१ जनाको ज्यान गएको छ । यो अवधिमा एक हजार आठ सय १२ वटा सडक दुर्घटनामा परी ज्यान गएको हो । यो तथ्यांक आर्थिक वर्ष २०७१, ७२ देखि २०७९,८० सम्मको हो । ‘मृत्यु मार्ग’को उपमा पाएको कर्णाली राजमार्ग सञ्चालनमा आएको १८ वर्ष पुरा भएको छ । वर्षा लाग्दा हिलाम्मे र हिउँद लाग्दा धुलाम्मे हुने यो राजमार्गको यात्रा सधैं जोखिमपूर्ण हुन्छ ।
यो राजमार्ग भएर जुम्ला, डोल्पा, मुगु, कालिकोट, अछाम र दैलेख यात्रा हुने गर्दछ । तर राजमार्गको स्तरोन्नतिमा सरकारले कुनै चासो नदिएको सर्वसाधारण आक्रोशपूर्ण गुनासो छ । सरकारले कर्णाली राजमार्गको अवस्था सुधार्न र नागरिकको पीडा सम्बोधन गर्न कानमा तेल हालेर बसेको उनको ठहर छ । संघीय सांसद विनिता कठायतले गत बुधबार सदनमा जरुरी सार्वजनिक महत्त्वको प्रस्तावसमेत दर्ता गराकी छन् ।
सांसद कान्तिका सेजुवाल, अम्मरबहादुर थापा, गणेश पराजुली, सोविता गौतमलगायत १३ सांसदको समर्थनमा उक्त प्रस्ताव दर्ता गरिएको हो । तर पनि वास्ता छैन । सांसद कठायतले भनिन्, ‘कर्णाली राजमार्ग कर्णाली क्षेत्रलाई मध्यपश्चिम र नेपालका अन्य भूभागसँग जोड्ने एक मात्र प्राथमिक सडक हो । तर हाल यसको अवस्था नाजुक भएका कारण जोखिम मोलेर यात्रा गर्नुपर्ने बाध्यता छ । २०६४ चैत ३० गते कर्णाली राजमार्ग हुँदै सुर्खेतबाट पहिलोपटक जुम्लामा गाडी पुगेको थियो ।
पश्चिम सुर्खेतबाट दैलेख र कालिकोट हुँदै कर्णाली नदीको किनारैकिनार भएर जुम्लासम्म पुग्न दुई सय ३२ किलोमिटर दुरी पार गर्नुपर्छ । साँघुरो र खाल्डाखुल्डी भएका कारण यात्रुले सास्ती खेप्दै यात्रा गर्दै आएका छन् । चट्टानी भाग छिचोलेर राजमार्गलाई दुई लेनको बनाउन सके जोखिम र दुर्घटना कम हुने देखिन्छ । त्यस्तै पहिरोको जोखिममा रहेका स्थानको पहिचान गरी व्यवस्थित गर्न सके यातायत सेवा सुरक्षित बनाउन सकिन्छ।
