- ६ आश्विन २०८३, मंगलवार / Sep 22, 2026
काठमाडौं । चाडपर्वका बेला चिनीकाे हाहाकार हुन थालेकाे छ । सरकारले ५० हजार टन चिनी जीटूजी मार्फत भारतबाट ल्याउने घोषणा गरेको थियो । त्यहीअनुसार भारतलाई साउन ५ मा चिठी पठायो । तर भारतले चिनी निर्यातमा बन्देज लगाइदियो । तर भारतमै चिनीको मूल्य बढ्न थालेपछि नियन्त्रण गर्न भन्दै जुन १ देखि अक्टोबर ३१ सम्म निर्यातमा रोक लगाएको थियाे ।
नेपाली बजारमा चिनीको कृत्रिम अभाव सुरु भएको छ । अर्थ मन्त्रालयलाई चिठी पठाउँदै उद्योग वाणिज्य तथा आपूर्ति मन्त्रालयले बजार हस्तक्षेपका लागि भनेर ६० हजार टन सहुलियतको चिनी ल्याउने पहल अघि बढाउन आग्रह गरेको छ । तर अर्थले सुनेको नसुनेझै गरेको छ ।
भदौ अन्तिमतिर २० हजार टन चिनी आयातका लागि ५० प्रतिशत भन्सार महसुल छुटमा आयात गर्न अर्थले साल्ट ट्रेडिङ कर्पोरेसन र खाद्य व्यवस्था तथा व्यापार कम्पनीलाई अनुमति दियो ।
अर्थले स्वीकृत गरेको परिमाणमध्ये साल्ट ट्रेडिङ कर्पोरेसनले १० हजार र खाद्य व्यवस्था तथा व्यापार कम्पनीले १० हजार टन आयातको जिम्मेवारी पाए । तर अहिले साल्टले ल्याउने भनेको चिनी आउने अवस्था नरहेको देखिएको छ ।
बजारमा चिनी नभएकै कारण मूल्य छोइनसक्नु उपभोक्ता बताउँ छन् । धेरैजसो पसलमा १५० रुपैयाँसम्म मूल्य तिर्न उपभोक्ता बाध्य छन् । चिनीको बजार नियन्त्रणबाहिर गएको छ । यही अवस्थालाई देखेर सरकारले उद्योगी गुहारिरहेको छ । आफूले ल्याउन नसकेपछि उद्योगीसँग पैंचोमा चिनी मागिरहेको छ ।
