- २९ जेष्ठ २०८३, शुक्रबार / Jun 12, 2026
काठमाडौं । इजरायलबाट नेपालीको उद्धार गर्ने कार्य ढिलाइ हुने भएको छ । चार्टर फ्लाइटका लागि रुट नपाइएपछि हमासको आक्रमणपछि इजरायलमा रहेका नेपालीले जतिसक्दो चाँडो उद्धार गरिदिन आग्रह गरिरहेका छन् । यता जहाज तयारी अवस्थामा राखिए पनि हवाई रुट नपाइएका कारण जहाज पठाउन नसकिएको सरकारले जनाएको छ ।
इजरायलका विदेशमन्त्री एली कोहेनलाई मंगलबार टेलिफोन गरेर त्यहाँ रहेका नेपालीलाई फर्काउन र मृतकको शव ल्याउने प्रक्रियामा सहजीकरण गरिदिन परराष्ट्रमन्त्री एनपी साउदले आग्रह गरेका छन् । हवाई रुट खुल्नेबित्तिकै उद्धाररका लागि जहाज पठाइने परराष्ट्र मन्त्रालयका प्रवक्ता सेवा लम्सालले बताइन्।
हमासको आक्रमणबाट १० जना नेपाली विद्यार्थीको ज्यान गएको छ । बाँकी विद्यार्थी र नेपालीहरूले सरकारको उपस्थिति खोजिरहेका छन् । अहिले संवेदनशील क्षेत्रबाट नेपालीहरू सुरक्षित स्थानमा सारिएको परराष्ट्र प्रवक्ता लम्सालले बताइन्। इजरायलस्थित नेपाली दूतावासले पनि हवाईसेवा नै अवरुद्ध भएकाले नेपालबाट विमान ल्याएर उद्धारर गर्ने सम्भावना तत्काल नरहेको बताएको छ ।
त्यहाँको अवस्था सहज बनेसँगै उद्धारको काम अघि बढाइने राजदूत कान्ता रिजालले बताएकी छन् । सरकारले नेपाल एयरलाइन्स र हिमालय एयरलाइन्सका विमान पठाएर आफ्ना नागरिकको उद्धार गर्ने तयारी गरेको छ।
