- ५ असार २०८३, शुक्रबार / Jun 19, 2026
दमक–१ मा ‘मर्निङ वाक’मा रहेका दुई महिला जङ्गली हात्तीको आक्रमणमा परेर घाइते
४२ वर्षीया कविता राई र ४७ वर्षीया सुनिता राई घाइते, सुनिताको अवस्था गम्भीर
हात्तीले सुँढले बेरेर लडाएको, शरीरका विभिन्न भागमा चोट
झापामा रैथाने हात्तीको आतंक: विगत वर्षमा ६ जनाको मृत्यु, ७ घाइते
निगुरो, च्याउ टिप्न, घाँस दाउरा खोज्न र मर्निङ वाकमा निस्किँदा आक्रमणका घटना बढ्दो
वन क्षेत्रसँग सटेको बस्ती उच्च जोखिममा, वन कार्यालयको चेतावनी
झापा, ११ साउन। ‘मर्निङ वाक’मा रहेका दमक नगरपालिका–१ बरगाछीका दुई महिला जङ्गली हात्तीको आक्रमणमा परी घाइते भएका छन् । घाइते हुनेमा दमक –१ ४२ वर्षीया कविता राई र ४७ वर्षीया सुनिता राई रहेको जिल्ला प्रहरी कार्यालयका सूचना अधिकारी खगेन्द्रबहादुर खड्काले जानकारी दिए ।
उनका अनुसार घरबाट निस्केर बाटोमा हिँडिरहेका बेला नजिकैको जङ्गलबाट निस्किएको हात्तीसँग उनीहरुको आज बिहान जम्काभेट भएको थियो । उनीहरुलाई हात्तीले सुँढले बेरेर लडाएका जनाइएको छ । उनीहरुको टाउको, हात, खुट्टा र शरीरका विभिन्न भागमा चोट लागेको छ । घाइतेलाई तत्काल उपचारका लागि दमक अस्पतालमा लगिएको छ ।
घाइतेमध्ये सुनिताको अवस्था गम्भीर रहेको बताइएको छ । आक्रमणपछि हात्ती जङ्गलतिर पसेको थियो । झापाको जलथल, निचाझोडा र स्थानीय सामुदायिक वनमा एक दर्जनभन्दा बढी सङ्ख्यामा रैथाने हात्ती बस्दै आएका छन् ।
जङ्गल छेउका बासिन्दा ती हात्तीको आक्रमणमा पर्दै आएका छन् । निगुरो र च्याउ टिप्न जाँदा, घाँस दाउरा खोज्न जाँदा र मर्निङ वाकमा हिँड्दा हात्तीले आक्रमण गर्दै आएको छ ।
एक वर्षमा छ जनाको मृत्यु
आर्थिक वर्ष २०८१र८२ मा जिल्लाका विभिन्न स्थानमा हात्तीको आक्रमणमा छ जनाको मृत्यु भएको डिभिजन वन कार्यालयले जनाएको छ । कार्यालयका प्रमुख भरतबाबु श्रेष्ठका अनुसार सोही अवधिमा हात्तीको आक्रमणबाट सात जना मानिस घाइते भएका थिए भने चारवटा हात्ती मृत भेटिएका छन् । रासस
