पदभार ग्रहणगर्दै बागमतीका स्वास्थ्यमन्त्री थापाको दुरगामी पहिलो निर्णय

हेटौंडा । मंगलबार गठन भएको बागमती प्रदेश सरकारका नव नियुक्त स्वास्थ्य मन्त्री किरण थापा मगरले स्वास्थ्य सुधारमा प्रभावकारी निर्णय गर्नुभएको छ । बुधबार पदभार ग्रहण गर्दै मन्त्री थापाले ३ वटा दुरगामी प्रभाव पार्ने निर्णय गर्नुभएको हो ।

मन्त्री थापाको पहिलो निर्णयमा प्रदेश सरकारले विगतमा क्यान्सर पीडित विपन्न नागरीकलाई दिदै आएको ५० हजार आर्थिक सहुलियतलाई बढाएर रु १ लाख दिने पुर्‍याउने रहेको छ । उक्त निर्णयलाई प्रभावकारी वनाउन थप आवश्यक पर्ने ११ करोड बजेट मन्त्रिपरिसद्मा माग गर्ने मन्त्री थापाले बताउनुभयो ।

दोस्रो निर्णयमा मेरो स्वास्थ्य, मेरो जिम्मेवारी अभियान तथा मानसिक स्वास्थ्य प्रवद्र्धन अभियानको प्रभावकारी कार्यान्वयन सुनिश्चित गर्न जिल्ला स्तरमा नसर्ने रोग तथा मानसिक रोग रोगथाम र न्युनिकरण सम्बन्धी जिल्लास्तरीय समन्वय समिति गठन गर्ने रहेको छ ।

नवनियक्त स्वास्थ्यमन्त्री थापाले मेरो स्वास्थ्य, मेरो जिम्मेवारी अभियान प्रदेशका सबै जिल्ला र स्थानीय तहमा सञ्चालन गर्ने बताउँदै निर्णय कार्यान्वयनका लागि नागरिकलाई सचेतना फैलाउन विभिन्न ९ ओटा नारा तय गर्ने जानकारी दिनुभयो ।
उल्लेखित नाराहरु
१. म रक्सी, चुरोट र सुर्तिजन्य पदार्थ खान्नँ ।
२. म नियमित योग तथा व्यायाम गर्छु ।
३. म स्वस्थ र पोषिलो खाना खान्छु ।
४. म नियमित स्वास्थ्य परिक्षण गर्छु ।
५. म मेरो परिवार र समुदायको स्वास्थ्य प्रति सजक रहन्छु ।
६. मेरो परिवारको स्वास्थ्य विमा गराउछु ।
७. म मेरो घर, आँगन र वातावरण सफा राख्छु ।
८. म मेरो परिवारको ३० वर्ष माथिका महिलाहरुको स्तन क्यान्सर र पाठेघरको मुखको क्यान्सरको परिक्षण गराउछु ।
९. म ट्राफिक नियमको पालना गर्छु । जस्ता नाराहरु रहेका छन् ।