- ४ आश्विन २०८३, आईतवार / Sep 20, 2026
काठमाडौं । धरहरा अवलोकनका लागि यही माघ १५ गतेदेखि एक घण्टा समय बढाइएको छ । पुनःनिर्माण भएपछि मंसिर ९ गतेदेखि सञ्चालनमा आएको धरहरा अवलोकन गर्ने समय एक घण्टा बढाइएको हो ।
सञ्चालनको तीन महिना नपुग्दै प्रवेश शुल्कबापत एक करोड ५२ लाख राजस्व संकलन भएको छ । माघ १४ गतेसम्म ३ः१५ बजेसम्म मात्र धरहरा चढ्न टिकट काट्ने गरिएको थियो ।
गर्मी बढ्न थालेसँगै अहिले समय थप गरी ४ः१५ बजेसम्म टिकट काट्ने पाइने र साँझ ५ बजेसम्म चढ्न पाइने जनाइएको छ । प्रत्येक बुधबार धरहरा बन्द रहने बाहेक अन्य दिन यहाँ दैनिक एक हजार दुई सयको हाराहारीमा नागरिक आउने गरेका छन् ।
गत मंसिर ९ गतेदेखि सर्वसाधारणलाई शुल्कसहित खुला गरिएको ऐतिहासिक धरहराबाट यही माघ २४ गते बिहीबारसम्ममा टिकट बिक्रीबापत उक्त रकम संकलन भएको हो । धरहराको पार्किङ स्थलमा पार्किङ गर्दा चारपांग्रे सवारीका लागि प्रतिघण्टा २० रुपैयाँ र दुईपांग्रे सवारीका लागि १० रुपैयाँ तोकिएको छ ।
धरहरा चढ्न प्रतिव्यक्ति दुई सय रुपैयाँ शुल्क तोकिएको छ । विद्यार्थी, ज्येष्ठ नागरिक, बालबालिका, अपांगता भएका व्यक्तिलाई ५० प्रतिशत छुटको व्यवस्था गरिएको छ । यस्तै सार्क राष्ट्रबाट आउने पर्यटकलाई प्रतिव्यक्ति पाँच सय रुपैयाँ र सार्कबाहेकका राष्ट्रबाट आउनेलाई प्रतिव्यक्ति एक हजार रुपैयाँ शुल्क तोकिएको छ ।
विशिष्ट संरचना सञ्चालन तथा व्यवस्थापन विकास समिति (गठन) आदेश, २०८१ बमोजिम शुल्क लिइ धरहरा सञ्चालनमा ल्याइएको र मंसिर ६ गतेको मन्त्रिपरिषद् बैठकले धरहरा खुला गर्ने र शुल्क स्वीकृत गर्ने निर्णय गरेको थियो ।
