- २८ श्रावण २०८३, बिहीबार / Aug 13, 2026
काठमाण्डौ । धनुषा र रुकुम पूर्वमा भएका छुट्टाछुट्टै अटो दुर्घटनामा ६ जनाको ज्यान गएको र ७ जना घाइते भएका छन्। धनुषामा बस र अटो ठोक्किँदा एकै परिवारका तीन जनासहित चार जनाको मृत्यु भएको जिल्ला प्रहरी कार्यालय धनुषाले जनाएको छ।
दुई बालबालिका घाइते छन्। मृत्यु हुनेहरूमा ४० वर्षीय धनबहादुर पुर्वछाने मगर, उनका भाइ ३५ वर्षीय शम्भु पुर्वछाने मगर, ३५ वर्षीया निशा मगर र ४० वर्षीय अटो चालक डम्बर राई रहेका छन्।
घाइते १४ वर्षीया शीतल मगर र ९ वर्षीय रोशन मगरको जनकपुरधामको न्युरो अस्पतालमा उपचार भइरहेको छ। त्यस्तै, रुकुम पूर्वको भुमे गाउँपालिका–१ स्यावालमा अटो दुर्घटनामा ३० वर्षीया रेजिना घर्ती र २५ वर्षीया फिसोल्टी घर्तीको मृत्यु भएको प्रहरीले जनाएको छ।
घाइतेहरू -प्रतिक्षा बुढा, उनका ११ महिनाका छोरा सुभम बुढा, ब्युटी पुन, दुई वर्षकी समृद्धी बुढा र तीन वर्षका सक्षम घर्तीको जिल्ला अस्पताल रुकुमकोटमा उपचारपछि डिस्चार्ज गरिएको जनाइएको छ।
