- २६ असार २०८३, शुक्रबार / Jul 10, 2026
काठमाडौँ, १५ मंसिर । नेपाल आयल निगमले डिजेल र मट्टितेलको मूल्य घटाएको छ । नयाँ मूल्यअनुसार डिजेल/मट्टितेल प्रतिलिटर १ रुपैयाँले सस्तो भएकाे छन् । निगम सञ्चालक समितिको निर्णयअनुसार मूल्य समायोजन आजदेखि लागू भएको हो ।
निगमका अनुसार नयाँ समायोजनपछि पहिलो वर्गका डिपोहरूमा प्रतिलिटर १४३ रुपैयाँ ५० पैसा, दोस्रो वर्गमा १४५ रुपैयाँ र तेस्रो वर्गमा १४६ रुपैयाँ कायम गरिएको छ । पहिलो वर्गमा चारआली, विराटनगर, जनकपुर, अमलेखगन्ज, भलबारी, नेपालगञ्ज, धनगढी र वीरगञ्ज डिपो छन् । दोस्रो वर्गमा सुर्खेत र दाङ, जबकि तेस्रो वर्गमा काठमाडौँ, पोखरा र दिपायल परेका छन् ।
यसैबीच, निगमले हवाई इन्धनको मूल्य भने बढाएको छ । आन्तरिक उडानतर्फ हवाई इन्धन प्रतिलिटर १३४ रुपैयाँ पुगेको छ । अन्तर्राष्ट्रिय उडानका लागि काठमाडौँमा हवाई इन्धनको दर प्रतिकिलोलिटर ४२ अमेरिकी डलरले वृद्धि भई १,०१५ डलर पुगेको निगमले जनाएको छ ।
इन्डियन आयल कर्पोरेसन (IOC) बाट प्राप्त नयाँ खरिद मूल्यका आधारमा डिजेल/मट्टितेलमा १ रुपैयाँ ४४ पैसा कमी र हवाई इन्धनमा ५ रुपैयाँ ६२ पैसा वृद्धि भएपछि खुद्रा मूल्य समायोजन गरिएको निगमले जानकारी दिएको छ ।
