- ४ आश्विन २०८३, आईतवार / Sep 20, 2026
काठमाण्डौ । देशभरको मौसम आंशिक बदलीदेखि मुख्यतया सफा रहेको छ । पश्चिमी वायुका साथै स्थानीय वायुको आंशिक प्रभाव रहेकोले दिउँसो देशका पहाडी भू–भागमा साधारणतया बदली हुने तथा बाँकी भागमा आंशिक बदलीदेखि मुख्यतया मौसम सफा रहने जल तथा मौसम पूर्वानुमान महाशाखाले जनाएको छ ।
काठमाण्डौलगायत नेपालका विभिन्न क्षेत्रमा पछिल्ला केही दिनदेखि बढेको वायु प्रदूषण पानी पर्दा समेत घटेको छैन । जल तथा मौसम पूर्वानुमान महाशाखाका अनुसार काठमाण्डौमा मौसम धुम्मिएको छ । पानी परे पनि आकाश खुल्न सकेको छैन । वायु गुणस्तर निगरानी गर्ने आईक्यू एअर इन्डेक्समा पनि काठमाण्डौ विश्वकै प्रदूषित शहरमध्ये तेस्रोमा परेको छ ।
उच्च पहाडी तथा हिमाली भागका एक–दुई ठाउँमा हल्का हिमपातको सम्भावना छ । कोशी, गण्डकी र कर्णाली प्रदेशका पहाडी भागका केही ठाउँमा तथा बाँकी प्रदेशका पहाडी भागका एक–दुई ठाउँमा मेघगर्जन र चटयाङसहित हल्का वर्षा हुने सम्भावना रहेको महाशाखाले जनाएको छ । काठमाण्डौमा बिहान नौ बजे एक्यूआई सूचकांक एक सय ८२ रहेको छ । पहिलोमा भारतको नयाँ दिल्ली रहेको छ । नयाँ दिल्लीको सूचकांक दुई सय चार छ ।
त्यस्तै दोस्रोमा पाकिस्तानको लाहोर रहेको छ । वायु प्रदूषणले मानव स्वास्थ्यमा गम्भीर असर पर्न सक्ने भन्दै चिकित्सकहरूले स्वास्थ्य सतर्कता अपनाउन आग्रह गरेका छन् । वातावरण विभागका अधिकारीहरूका अनुसार ठूलो वर्षा नभइ वा ठूलो हुरी नचलेसम्म वायु प्रदुषण कम हुने देखिएको छैन ।
काठमाण्डौ उपत्यकासहित देशका केही ठाउँमा पानी परेको थियो । बेलुकातिर काठमाण्डौ उपत्यका लगायत आसपासका क्षेत्रमा छिटपुट देखि हल्का वर्षाको सम्भावना रहेको मौसमविद्गोले जनाएका छन् ।
