- ३० चैत्र २०८२, सोमबार / Apr 13, 2026
फागुन २१ मा प्रतिनिधिसभा निर्वाचन
निर्वाचनमा अब ५२ दिन बाँकी
आयोगले सुरक्षाको भरपर्दो वातावरण बनेको निष्कर्ष
चारै सुरक्षा निकायबीच समन्वय
जिल्लालाई संवेदनशीलताअनुसार वर्गीकरण
निर्वाचन अधिकृतलाई अभिमुखीकरण तालिम
२ माघदेखि निर्वाचन क्षेत्रमै कार्यालय स्थापना
काठमाडौं, २८ पुष । आगामी फागुन २१ गते हुने प्रतिनिधिसभा सदस्य निर्वाचनका लागि राजनीतिक दल, उम्मेदवार र मतदाताका लागि सुरक्षाको भरपर्दो वातावरण बन्दै गएको निर्वाचन आयोगले निष्कर्ष निकालेको छ ।
सुरक्षाकै कारण राजनीतिक दलहरूले जनताबीच जान नसकिने अवस्था नरहेको जनाउँदै आयोगका प्रवक्ता नारायणप्रसाद भट्टराईले भन्नुभयो, “आयोगले एकीकृत सुरक्षा योजनाअनुसार सुरक्षाको बन्दोबस्त मिलाइसकेको छ ।”
निर्वाचनमा सुरक्षाकै कारण राजनीतिक दल र उम्मेदवारले मत माग्न वा मतदाताले मतदान गर्न असुविधा हुने स्थिति नआउने प्रवक्ता भट्टराईको भनाइ छ । उहाँका अनुसार एकीकृत सुरक्षा योजनाअनुसार चारै सुरक्षा निकायले समन्वयात्मक रूपमा काम गरिरहेका छन् ।
दुई महिनाअघि स्वीकृत सुरक्षा योजनामा जिल्लालाई संवेदनशीलताका आधारमा वर्गीकरण गरी मतदान केन्द्रमा सुरक्षाकर्मी परिचालन तथा निर्वाचन अवधिभरको सुरक्षा व्यवस्थापन समेटिएको छ ।
“राजनीतिक दल, उम्मेदवार र समर्थकहरूले निर्भयतापूर्वक जनतासमक्ष आफ्ना विचार राख्न सक्ने वातावरण छ,” उहाँले भन्नुभयो, “सुरक्षाकै कारण कसैलाई प्रचार–प्रसारमा अवरोध हुने अवस्था छैन । सुरक्षा निकाय चनाखो भएर काम गरिरहेका छन् र सरकारले आवश्यक स्रोत–साधन उपलब्ध गराएको छ ।”
यसैबीच, आयोगले हालै नियुक्त भएका मुख्य निर्वाचन अधिकृत र निर्वाचन अधिकृतहरूका लागि आज सोमबार र भोलि मंगलबार अभिमुखीकरण कार्यक्रम सञ्चालन गर्ने भएको छ । सातै प्रदेशका निर्वाचन अधिकृतहरूलाई काठमाडौं, चितवन, विराटनगर र नेपालगञ्ज गरी चार स्थानमा तालिम दिइने प्रवक्ता भट्टराईले जानकारी दिनुभयो ।
तालिम सञ्चालनका लागि आयोगका पदाधिकारी र कर्मचारीहरू कार्यविभाजन गरेर खटिइसकेका छन् । मुख्य प्रशिक्षक तयार पार्न प्रशिक्षक प्रशिक्षण सम्पन्न भइसकेको छ र ती प्रशिक्षकमार्फत थप तालिम सञ्चालन गरिने आयोगको योजना छ । प्रशिक्षणपछि निर्वाचन अधिकृतहरूले आगामी २ माघदेखि आ–आफ्नो निर्वाचन क्षेत्रमा कार्यालय स्थापना गरी काम सुरु गर्नेछन् ।
