हनुमन्ते, मनोहरा र महादेव खोला भक्तपुरको बस्तीमा पस्यो, २८ जनाको उद्धार

भक्तपुर । बाढीका कारण सूर्यबिनायक नगरपालिका वडा नम्बर २ र ४ तथा मध्यपुर थिमी नगरपालिका वडा नम्बर–१ का बासिन्दा प्रभावित भएकाछन् । भक्तपुरमा मनोहरा खोला र महादेव खोला बस्तीमा पसेपछि सूर्यबिनायक र मध्यपुर थिमी नगरपालिका नदी किनारबाट २८ जनालाई उद्धार गरिएको हो ।

सूर्यबिनायक नगरपालिका–४ स्थित मोर्डन कलेज अगाडी मगर गाउँमा महादेव खोला बस्तीमा पसेको र सूर्यबिनायक नगरपालिका–२ बालकोट र मध्यपुर थिमी नगरपालिका–१ मा मनोहरा खोला आसपासको बस्तीमा पसेको छ । खोला किनारका गाईगोठ र टहरामा क्षति पुगेको छ ।

सेना, सशस्त्र र नेपाल प्रहरीका सुरक्षाकर्मीले २८ जनालाई सुरक्षित स्थानमा सारेको छ । उता भक्तपुर नगरपालिका वडा नं ४ मा अवस्थित राम मन्दिर, बाराहीस्थान आसपास क्षेत्र डुवानमा परेका छन् । राधेराधे, तीनकुनेक्षेत्रमा बाढी घरमा समेत पसेको छ ।