- १६ जेष्ठ २०८३, शनिबार / May 30, 2026
मुख्य बुँदा
कञ्चनपुर कारागारबाट भागेका ११७ जना कैदीबन्दी सम्पर्कमा
कारागार प्रशासन र प्रहरीको आग्रहपछि कैदी फिर्ता हुँदै
केही कैदी भारतीय सीमा सुरक्षा बल (एसएसबी) मार्फत पनि नियन्त्रणमा
चितवन भरतपुर कारागारबाट ५४ कैदीबन्दी आफैँ फर्किएका
दुवै कारागारमा आगजनी र तोडफोड पछि सुरक्षाकर्मीलाई चुनौती
कञ्चनपुर, २७ भाद्र । जेनजी प्रदर्शनका क्रममा मङ्गलबार साँझ कञ्चनपुर कारागारबाट भागेका कैदीबन्दीहरु क्रमशः सम्पर्कमा आउन थालेका छन्।
जिल्ला प्रशासन कार्यालय कञ्चनपुरले कारागारबाट भागेका कैदीबन्दीलाई फर्किन आग्रह गरेसँगै बुधबारदेखि ११७ जना कैदीबन्दी फिर्ता आएका छन्। केहीले फोन सम्पर्क गरी आउने क्रम जारी राखेका छन् भने केही इलाका प्रहरीको सम्पर्कमा आएका छन्।
कञ्चनपुर कारागारमा ४७८ जना कैदीबन्दी रहेका थिए, जसमा ४५५ जना मङ्गलबार साँझ भागेका थिए। हाल २३ जना कैदीबन्दी भने भागेका छैनन्। कारागारमा लागुऔषध, महिला हिंसा, चोरी, ठगी, जबर्जस्ती करणी, ज्यान मार्ने उद्योगलगायतका मुद्दाका कैदी राखिएका छन्। बुधबार भारतीय सीमा सुरक्षा बल (एसएसबी)ले आठ जना भागेका कैदीलाई नियन्त्रणमा लिएर नेपाल प्रहरीले बुझाएको थियो।
भरतपुर, चितवन – चितवनको भरतपुर कारागारबाट बुधबार बिहान आगजनी गरी भागेका ५४ जना कैदीबन्दी आफैँ फिर्ता आएका छन्। कारागारमा ७४० कैदीबन्दी थिए, जसमा ४६ जना महिला रहेका थिए।
सुरक्षाकर्मीको घेरा तोडेर बाहिर निस्किएका कैदीहरुलाई फोन गरेर बोलाएपछि फर्किन थालेको जिल्ला कारागार प्रमुख रवीन्द्र ढुङ्गानाले जानकारी दिए। ढुङ्गानाका अनुसार भागेका कैदीहरुले कारागार तोडफोड गर्दै आगजनी गर्न थालेपछि सुरक्षाकर्मीहरु उनीहरुलाई नियन्त्रण गर्न असमर्थ भए। आगोको कारण मूल गेटमा क्षति पुगेको थियो।
