- ११ श्रावण २०८३, सोमबार / Jul 27, 2026
एजेन्सी । फेलिक्स सिसेकेडी प्रजातान्त्रिक गणतन्त्र कंगोमा राष्ट्रपति निर्वाचित भएका छन् । उनी दोस्रो कार्यकालका लागि निर्वाचित भएका हुन । राष्ट्रपतिले करिब ७३ प्रतिशत भोट ल्याएको तथा उनका निकटतम प्रतिद्वन्द्वी मोइस कातुम्बीले १८ प्रतिशत मत प्राप्त गरेको निर्वाचन कार्यालयको घोषणा छ ।
उनका विपक्षी उम्मेदवारहरूले भने पुनः मतदानको माग गर्दै यो चुनावलाई “धोखा’’को रूपमा निन्दा गरेका छन् । आइतबार निर्वाचन परिणाम घोषणा गरिएपछि कैयौं प्रमुख प्रतिद्वन्द्वीहरूले विरोध प्रदर्शनको आह्वान गरेका छन् ।
राजधानी किन्शासाका विभिन्न भागमा कुनै अशान्ति हुन नदिन सेना परिचालन गरिएको छ भने सिसेकेदीका समर्थकहरू विजय उत्सव मनाइरहेका छन् । गत २० डिसेम्बरमा भएको चुनावमा व्यापक कमजोरी तथा धाँधली भएको आरोप लागेको छ ।
देशका केही भागहरूमा दोस्रो दिन पनि मतदान विस्तार गर्नुपरेको थियो भने पर्यवेक्षक समूहका अनुसार करिब दुई तिहाइ मतदान केन्द्रहरू निर्धारित समयभन्दा निकै ढिला मात्रै खुलेका थिए ।
