- २२ कार्तिक २०८३, आईतवार / Nov 8, 2026
ललितपुर । डढेलो निभाउने क्रममा दुई जना घाइते मध्य एकजनाको ज्यान गएको छ । ललितपुरको गोदावरी नगरपालिका–४ बडीखेल जङ्गलमा फैलिएको डढेलो निभाउने क्रममा एक जनाको ज्यान गएको हो भने एक जनाको उपचार भइरहेको छ ।
वडा नम्बर ३ को फूलचोकी जङ्गल क्षेत्रबाट शुरु भएको डढेलो फैलिएर वडा नम्बर ४, ५ र ६ मा पुगेको छ । डढेलो फैलिएपछि वडा नम्बर ६ को आनन्द वन कुष्ठरोग अस्पताल पनि जोखिममा परेको र अस्पतालका ९३ जना बिरामीलाई अन्तै सारिएको प्रहरीले जनाएको छ ।
डढेलो नियन्त्रणका लागि सेना, सशस्त्र, नेपाल प्रहरी, अग्नि नियन्त्रक तथा चार वटा दमलकसहितको टोली परिचालित भएको छ ।
डढेलो निभाउने क्रममा स्थानीय शंकर पहरीको मृत्यु भएको र रमेश पहरी घाइते भएको जिल्ला प्रहरी परिसर ललितपुरले जनाएको छ । घाइतेको कीर्तिपुर जलन उपचार अस्पतालमा उपचार भइरहेको छ । आनन्द वन अस्पतालमा कुष्ठरोगीको उपचार हुँदै आएको छ ।
