१५ दिनसम्म नौबिसे–मलेखु सडक रातमा पाँच घण्टा बन्द हुने, पुलको संरचनामा काम गर्न सडक बन्द

काठमाण्डौ । नौबिसे–मलेखु सडक १५ दिनसम्म रातमा पाँच घण्टा बन्द हुने भएको छ । पृथ्वी राजमार्ग अन्तर्गत उक्त सडक खण्ड बुधबारदेखि १५ दिनसम्म रातिमा मात्रै बन्द हुने भएको हो ।

यो सडक खण्डमा पर्ने गणेश खोला, डाङडुङ खोला, खेस्टे खोला र पोखरा खोलाका पुलको संरचनामा काम गर्न सडक बन्द गर्न लागिएको हो । सडक बन्द भएको बेलामा अत्यावश्यक सेवाका एम्बुलेन्स, सुरक्षा निकायलगायतका गाडी चल्ने छन् ।

सडकको विकल्पमा गल्छी–बिदुर–छहरे–टोखा सडक प्रयोग गर्न सकिने पनि आयोजनाले जनाएको छ । नागढुङ्गा–मुग्लिङ सडक आयोजना (पूर्वी खण्ड) ले एक सूचना निकालेर नौबिसे–मलेखु सडक खण्ड राति १० बजेदेखि बिहान ३ बजेसम्म बन्द गर्न लागिएको जनाएको छ ।