देशभरको मौसम सफा रहने पूर्वानुमान

काठमाडौँ । नेपालमा हाल पश्चिमी न्यून चापीय प्रणालीको आंशिक प्रभाव रहेको छ, जसका कारण कर्णाली र सुदूरपश्चिम प्रदेशका पहाडी भू-भागमा आंशिक बदली हुँनेछ भने बाँकी भागमा मौसम सफा र तराईका धेरै स्थानहरूमा हुस्सु लागेको जल तथा मौसम विज्ञान विभागले जनाएको छ।

त्यसैगरी आज दिउँसो गण्डकी, कर्णाली र सुदूरपश्चिम प्रदेशका पहाडी भू-भागमा आंशिकदेखि साधारण बदली रहने छ। उच्च पहाडी तथा हिमाली क्षेत्रहरूमा हल्का हिमपातको सम्भावना रहेको विभागले जनाएको छ। साथै, राति पनि यी प्रदेशका पहाडी भू-भागमा मौसम आंशिक बदली रहने छ भने बाँकी स्थानमा मौसम सफा हुनेछ।

हुस्सुको सम्भावना र सतर्कता:

विभागका अनुसार, आगामी २४ घण्टामा कर्णाली र सुदूरपश्चिमका उच्च पहाडी तथा हिमाली भू-भागमा हल्का हिमपातको सम्भावना छ। गण्डकी प्रदेशका उच्च पहाडी र हिमाली भेगमा पनि हिमपात हुन सक्नेछ। बिहीबार बिहान, तराईका धेरै स्थानमा हुस्सु लाग्ने सम्भावना रहेको छ, जसले दैनिक जीवन, कृषि, यातायात, स्वास्थ्य र हवाई उडानमा असर पुर्याउन सक्छ।

तसर्थ, मौसमको अनुकूलनसँगै सम्बद्ध सबै पक्षलाई सतर्कता अपनाउन आग्रह गरिएको छ।