- ११ श्रावण २०८३, सोमबार / Jul 27, 2026
काठमाडौँ, २९ साउन । वैदेशिक रोजगारीको नाममा ६६ जनाबाट करिब ४ करोड १७ लाख रुपैयाँ ठगी गरी फरार रहेका एक अभियुक्तलाई प्रहरीले कास्कीबाट पक्राउ गरेको छ।
काठमाडौँ उपत्यका अपराध अनुसन्धान कार्यालयको टोलीले एनएन मेरिटाइम ट्रेनिङ एण्ड एजेन्सी प्रालिका सञ्चालक त्रिलोक सिंहलाई पोखरा महानगरपालिका–२७ स्थित डाँडाकोनामा लुकीछिपी बसेको विशेष सूचनाको आधारमा पक्राउ गरेको हो।
पीडित डम्बर देउवा लगायतले दिएको जाहेरीका आधारमा सिंहविरुद्ध वैदेशिक रोजगारी ठगी सम्बन्धी मुद्दा दायर भएको थियो। उपत्यका अपराध अनुसन्धान कार्यालयको टोलीले इलाका प्रहरी कार्यालय शिशुवा, कास्कीसँग समन्वय गरी साउन २८ गते उनलाई पक्राउ गरेको जानकारी प्रहरीले दिएको छ।
पक्राउ परेका २९ वर्षीय सिंहको स्थायी ठेगाना बझाङ जिल्लाको बङ्गल नगरपालिका वडा नं. ६ भए पनि हाल उनी काठमाडौंको बुढानिलकण्ठ नगरपालिका वडा नं. १ मा बस्दै आएका थिए। सिंहलाई थप अनुसन्धान र कारबाहीका लागि वैदेशिक रोजगार विभाग, ताहाचल, काठमाडौँमा बुझाइएको छ।
