- ५ आश्विन २०८३, सोमबार / Sep 21, 2026
काठमाण्डौ । प्रधानमन्त्री पुष्पकमल दाहाल प्रचण्डले गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल पूर्ण क्षमतामा सञ्चालनका लागि प्रस्ताव तत्कालै ल्याउन पर्यटन मन्त्रालय र नागरिक उड्डयन प्राधिकरणलाई निर्देशनसमेत दिएका छन् ।
सम्बन्धित निकायसँग शुक्रबार छलफल गर्दै सरकारले राष्ट्रिय गौरवको आयोजनाका रूपमा रहेका गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थललाई पूर्ण क्षमतामा सञ्चालन गर्न उनले निर्देशन दिएका हुन । वैदेशिक रोजगारीमा जाने र अन्य यात्रुलाई भैरहवा र पोखराबाटै उडान गराउने गरी तयारी गर्नुपर्नेमा प्रधानमन्त्रीको जोड छ ।
त्यसका लागि श्रम स्वीकृति, अध्यागमन, मेडिकललगायत सरकारी सेवा पोखरा र भैरहवामा व्यवस्थित गरिनुपर्नेमा प्रचण्डले जोड दिएका छन् । सरकारले विमानस्थल पूर्ण क्षमतामा सञ्चालनका लागि हवाई टिकट, ग्राउन्ड ह्यान्डलिङ, हवाई इन्धनमा सहुलियत दिन सक्ने बताएको छ ।
प्रधानमन्त्री तथा मन्त्रिपरिषद्को कार्यालय सिंहदरबारमा भएको छलफलमा प्रधानमन्त्री प्रचण्डले गौतमबुद्ध र पोखरा अन्तर्राष्ट्रिय विमानस्थल पूर्ण क्षमतामा सञ्चालन गर्ने विकल्प र उपायबारे सरोकारवाला निकायसँग छलफल गरहेका हुन । काठमाण्डौको त्रिभुवन अन्तर्राष्ट्रिय विमानस्थलमा एअर ट्राफिकको समस्या रहेको र यसको उचित समाधान दिनुपर्ने आवश्यकता पनि देखिएको छलफलका क्रममा उठेको छ ।
संस्कृति, पर्यटन तथा नागरिक उड्डयनमन्त्री हितबहादुर तामाङले छलफलमा प्रधानमन्त्रीले दुवै विमानस्थल देशका लागि रणनीतिक महत्त्वका परियोजना भएको भन्दै पूर्ण क्षमतामा सञ्चालनका लागि सरकारी निकायले समन्वयकारी रूपमा समाधान खोज्नुपर्ने बताए ।
सरकारको ठूलो लगानी भएको र निजी क्षेत्रले समेत पर्यटन पूर्वाधारमा लगानी गरिसकेको अवस्थामा ती विमानस्थल पूर्ण क्षमतामा सञ्चालन गर्नुको विकल्प नरहेको प्रधानमन्त्रीको भनाइ छ ।
