- १३ जेष्ठ २०८३, बुधबार / May 27, 2026
एजेन्सी, १५ जेठ । संयुक्त राष्ट्रसंघीय मौसम र जलवायु एजेन्सी विश्व मौसम विज्ञान सङ्गठन (डब्ल्यूएमओ) ले सन् २०२९ सम्म विश्वव्यापी औसत तापक्रम १ दशमलव ५ डिग्री सेल्सियसभन्दा माथि पुग्ने सम्भावना रहेको चेतावनी दिएको छ। वार्षिक प्रतिवेदन अनुसार, पूर्वऔद्योगिक समयको तुलनामा तापक्रम १.५ डिग्रीले बढ्ने सम्भावना करिब ७० प्रतिशत छ।
सन् २०२३ र २०२४ मा पनि विश्वव्यापी तापक्रम १.५ डिग्री सेल्सियसभन्दा बढी बढिसकेको छ, जुन छोटो समयको वृद्धि भनेर मानिएको थियो। तर आगामी पाँच वर्षसम्म तापक्रम त्यसरी नै बढेर समग्र औसतमा १.५ डिग्री पार गर्ने जोखिम बढेको छ।
सन् २०१५ मा पेरिस जलवायु सम्झौताले विश्वव्यापी तापक्रमलाई पूर्वऔद्योगिक स्तरभन्दा २ डिग्री सेल्सियसभन्दा कम र सकेसम्म १.५ डिग्री सेल्सियसभन्दा कम सीमित गर्ने लक्ष्य राखेको थियो। तापक्रम १.५ डिग्री पार गर्नु भनेको त्यो सीमा पार गर्ने विन्दु हो, जसले जलवायु परिवर्तनका खतराहरूलाई तीव्र बनाउँछ।
कोइला, तेल र ग्यासको जलनबाट उत्सर्जित कार्बनडाइअक्साइड मुख्य हरितगृह ग्यास हो, जसले जलवायु परिवर्तनलाई बढावा दिन्छ। डब्ल्यूएमओका उपमहासचिव को ब्यारेटले आगामी वर्षहरूमा अर्थव्यवस्था, दैनिक जीवन, पारिस्थितिक प्रणाली र सम्पूर्ण पृथ्वीमा यसले नकारात्मक प्रभाव पार्ने बताएका छन्।
विश्वले जलवायु परिवर्तन रोक्न तत्काल कदम नचाले यसको असर सबै क्षेत्रहरूमा गहिरो पर्नेछ भन्ने सन्देश यस रिपोर्टले दिन्छ।
