- ३१ आश्विन २०८३, शनिबार / Oct 17, 2026
बारा । प्रहरीले प्रधानाध्यापक हत्याका मुख्य अभियुक्त पक्राउ गरेको छ । सदरमुकाम कलैयामा दिन दहाडै निजी बिद्यालयका प्रधानाध्यापकमाथि गोली प्रहार गरी हत्या घटनाका मुख्य अभियुक्त पक्राउ गरेको हो ।
पक्राउ पर्नेमा भारतको मोतिहारी दर्पा थाना–१, सुक्लहियाका २५ वर्षिय सुजित कुमार सिंह रहेको जिल्ला प्रहरी कार्यालय बाराका प्रहरी उपरीक्षक सुरेश काफ्लेले बताए । उनकोसाथबाट प्रहरीले एक थान पेस्तोल र पाँच थान गोली बरामत गरेको छ ।
बिश्रामपुर गाँउपालिका वडा नं ३ मा देखिएका उनलाई प्रहरीले पक्राउ गर्ने क्रममा भाग्न खोजेपछि खुट्टामा गोली प्रहार गरी पक्राउ गरिएको काफ्लेले बताए । सिंहको दुवै खुट्टामा गोली लागेको छ ।
गत असोजको दोश्रो हप्ता बाराको सदरमुकाम कलैयामा वडा नम्बर ६ मा दुई मोटरसाईकलमा आएका चार जनाको अज्ञात समुहले बाल एकता बोर्डिङका प्रधानाध्यापक रुपेश स्वर्णकारलाई दिन दहाडै गोली प्रहार गरी हत्या गरेका थिए ।
स्वर्णकार अन्नपूर्ण स्विट्सबाट मिठाई किनेर मोटरसाइकलमा बिद्यालय फर्किरहेका बेला अज्ञात समुहले छाती, टाउकोमा गरी चार राउन्ड गोली प्रहार गरी फरार मध्येका मुख्य सुटर सिह रहेको प्रहरीले यस अघिनै पत्रकार सम्मेलन गरी जानकारी दिएको थियो ।
खुट्टामा गोली लागेका सिहलाई कलैया अस्पतालमा राखेर उपचार भईरहेको प्रहरीले जनाएको छ । सार्पसुटरका नामबाट परिचित सिंह यसअघिका बाराका दुई घटनाका समेत सुटर रहेको प्रहरीले जनाएको छ । घटनाको छानविन भईरहेको र विस्तृत विवरण आउन बाँकी रहेको प्रहरीले जनाएको छ ।
