- २८ श्रावण २०८३, बिहीबार / Aug 13, 2026
गोरखा, ५ मंसिर । गोरखा जिल्लामा बढ्दै गएको मोटरसाइकल चोरी रोक्न ट्राफिक प्रहरीले ग्रामीण भेग लक्षित गरेर कडा छड्के जाँच सुरु गरेको छ । जिल्ला ट्राफिक प्रहरी कार्यालयका इन्चार्ज सुरज अर्यालका अनुसार ट्राफिक प्रहरीको उपस्थिति नपुगेका दुर्गम स्थानहरूलाई प्राथमिकतामा राखेर व्यापक निगरानी थालिएको हाे ।
उनका अनुसार आरुघाटबाट सोती हुँदै उत्तरी गोरखाको माछाखोला क्षेत्रसम्म ‘पठाओको नाममा चलाइने चोरीका बाइक’ सम्बन्धी गुनासो बढेपछि केही दिनदेखि ती क्षेत्रमा विशेष चेकजाँच चलाइएको छ । जाँचका क्रममा ट्राफिक प्रहरीले सोती बजार नजिकै लामो समयदेखि बेवारिसे अवस्थामा रहेको ग १७ प २३९० नम्बरको मोटरसाइकल नियन्त्रणमा लिएको छ । बाइकको चाबी फुटाइएको अवस्थामा भेटिएको र चोरीको भए/नभएकोबारे अनुसन्धान भइरहेको प्रहरीको भनाइ छ । छड्के चेकिङमा १३ वटा सवारी साधन सवारी ऐन उल्लङ्घनको आरोपमा कारबाहीमा परेका छन् भने कारबाहीमा पर्ने मध्ये एउटा स्कार्पियो, दुई वटा बोलेरो र बाँकी मोटरसाइकल रहेका छन् ।
बढी भाडा लिएकाे बारे आएका गुनासो पनि प्रहरीले निगरानी गरेको तर सो किसिमको अनियमितता भेटिन नसकेको इन्चार्ज अर्यालले बताए । चेकजाँचसँगै चालक र सर्वसाधारणलाई ट्राफिक नियमबारे सचेत गराइएको पनि उनको भनाइ छ ।
इलाका प्रहरी कार्यालय आरुघाट र जिल्ला ट्राफिक प्रहरी कार्यालय गोरखाले संयुक्त रूपमा गरेको उक्त छड्के अभियानमा इलाका प्रहरी निरीक्षक अनिल श्रेष्ठको टोली र ट्राफिक प्रहरी इन्चार्ज अर्यालको टोली खटिएको थियो ।
