- २२ कार्तिक २०८३, आईतवार / Nov 8, 2026
काठमाडौं, २४ असार । देशका विभिन्न क्षेत्रमा पछिल्लो केही घण्टादेखि व्यापक वर्षा भइरहेको र अझै निरन्तर वर्षा हुने सम्भावना देखिएको भन्दै जल तथा मौसम विज्ञान विभागले उच्च सतर्कता अपनाउन सबैलाई आग्रह गरेको छ।
विशेष गरी बागलुङ, मकवानपुर र सर्लाही जिल्लामा बाढी र पहिरोको जोखिम बढेको विभागले जनाएको छ। बागलुङ जिल्लास्थित गलकोट वर्षा मापन केन्द्र वरपर पछिल्ला ६ घण्टामा भारी वर्षा मापन गरिएको छ। सो क्षेत्रबाट बहने साना खोलाहरूमा आकस्मिक बहाव बढ्ने खतरा रहेको र कमजोर जमिनमा पहिरोको सम्भावना देखिएको छ। स्थानीय बासिन्दालाई सतर्क रहन आग्रह गरिएको छ।
मकवानपुर जिल्लास्थित लालबकैया खोलाको जुरेलीबजार जलमापन केन्द्रमा जल सतह सतर्कता तह नजिक पुगेको र अझै बढ्दो अवस्थामा रहेको जनाएको छ। बाढी जोखिम बढेसँगै खोलाको किनारमा बसोबास गर्नेहरुलाई विशेष सावधानी अपनाउन भनिएको छ।
सर्लाही जिल्लाको पत्थरकोट र परवानीपुर वर्षा मापन केन्द्रमा मध्यम वर्षा मापन भएको छ। ती क्षेत्रमा साना खोलाहरूमा बहाव बढ्ने र होचा भूभागमा डुबानको सम्भावना रहेको जनाइएको छ। जल तथा मौसम विज्ञान विभागले खोलानाला आसपास र पहिरो जोखिमयुक्त क्षेत्रमा बस्ने सबै स्थानीयवासीलाई सतर्क रहन र आवश्यक पूर्व तयारी गर्न पुनः आग्रह गरेको छ।
