- २५ फाल्गुन २०८२, सोमबार / Mar 9, 2026
काठमाडौं । काठमाडौंमा बदली र वर्षा कम हुँदा गर्मी बढेको छ । काठमाडौंमा धेरै समय मौसम बदली नहुनु र धेरै ठाउँमा लामो अवधिसम्म वर्षा नहुँदा गर्मी बढेको हो । काठमाडौंमा बुधबारको अधिकतम तापक्रम ३४.३ डिग्री सेल्सियस मापन भएको थियो । बिहीबार पनि यसकै सेरोफेरोमा तापक्रम रहने जल तथा मौसम विज्ञान विभागले जनाएको छ ।
यो वर्ष काठमाडौंमा सबैभन्दा बढी ३४.४ डिग्री सेल्सियस तापक्रम मापन गरिएको छ । यो वर्ष काठमाडौंमा सबैभन्दा बढी तापक्रम जेठ २८, १७ र ११ मा समान ३४.४ डिग्री सेल्सियस नै मापन गरिएको थियो । यो गत वर्षकोभन्दा काठमाडौंको बढी तापक्रम हो । विभागका अनुसार गत वर्ष काठमाडौंको अधिकतम तापक्रम ३३।३ डिग्री सेल्सियस मापन गरिएको थियो । १० जुनमा गत वर्षको अधिकतम तापक्रम ३३।३ डिग्री सेल्सियस थियो ।
सन् २०१५ मा काठमाडौंको तापक्रम ३५ डिग्री सेल्सियस थियो । तथ्यांकअनुसार यो वर्ष काठमाडौं पछिल्ला नौ वर्षयताकै गर्मी बनेको छ । सन् २०१५ को जुन ६ मा काठमाडौंको तापक्रम ३५ डिग्री सेल्सियस मापन गरिएको विभागको तथ्यांक छ । त्यसयता ०१६ मा ३४.२ डिग्री सेल्सियस अधिकतम तापक्रम थियो । जुन तापक्रमलाई यो वर्षको तापक्रमको रेकर्डले उछिनिसकेको छ ।
हिउँदे वर्षा नहुनु, पृथ्वीको तापक्रम निरन्तर बढ्नु, प्राकृतिक हिसाबले पनि सामुद्रीक प्रणालीहरू परिवर्तन भइरहनु तापक्रम बढ्नुको कारण हो ।
यो वर्ष काठमाडौंमा अझै गर्मी बढ्नसक्ने सम्भावनालाई नकार्न नसकिने मौसमविद् रोजन लामिछाने बताउँछन् । तर, कोसी प्रदेशबाट मनसुन नेपाल भित्रिसकेका कारण ३२ देखि ३४ डिग्री सेल्सियसकै हाराहारीमा काठमाडौंको तापक्रम रहने उनको भनाइ छ ।
