- १६ जेष्ठ २०८३, शनिबार / May 30, 2026
काठमाडौं ।धादिङ र काभ्रेका प्रमुख जिल्ला अधिकारीलाई सरुवा गरिएको छ । गृह मन्त्रालयले धादिङमा सुमन घिमिरे र काभ्रेमा उमेश ढकाललाई प्रमुख जिल्ला अधिकारी बनाएर पठाइएको छ । यसअघि धादिङमा राजेन्द्रदेव पाण्डे र काभ्रेमा सूर्य प्रसाद सेढाइँ प्रमुख जिल्ला अधिकारी थिए ।
उनीहरुलाई गृहमन्त्रालयमा तानिएको गृहका प्रवक्ता ऋषिराम तिवारीले बताए । मनसुन सक्रिय भएको पूर्वसूचना हुँदाहुँदै सवारी साधन सन्चालनमा रोक नलगाउँदा धेरै क्षति भएको निष्कर्षसहित उनीहरुको सरुवा गरिएको बुझिएको छ । मौसम पूर्वानुमान महाशाखाले बेलैमा गराएको सचेतना र सञ्चारमाध्यमबाट त्यसको व्यापक प्रचार प्रसार हुँदाहुँदै सयौँ सवारीसाधन र यात्रुलाई राजमार्गमा निस्किन अनुमति दिँदा यति ठूलो मानवीय क्षति भएको गृहको ठहर छ ।
नौबिसे–नागढुंगा सडक खण्डको झ्याप्ले खोलाको पहिरोले सवारी साधन पुर्दा ३५ जनाको मृत्यु भएको छ । काभ्रेमा ५० जनाको मृत्यु भएको प्रहरीको तथ्यांक छ । काभ्रेतर्फ बीपी राजमार्ग खण्डमा ठूलो क्षति पुग्दा यात्रुहरु बीचबाटोमै अलपत्र परेका छन् ।
