नवीकरण नभएका तीन वटा पाँचतारे होटल बन्द

काठमाडौं । पाँचतारे होटलमध्ये तीन वटा पाँचतारे होटलको सेवा बन्द भएको छ । अहिले पोखरास्थित होटल द फूलबारी लिमिटेड, काठमाडौंको लाजिम्पाटस्थित होटल साङ्ग्रिला र दरबारमार्गस्थित होटल डेला अन्नपूर्णको सेवा अहिले बन्द भएको हो । यी होटल आन्तरिक कारणले बन्द भएको पर्यटन विभागका निर्देशक तथा प्रवक्ता कालीबहादुर भुजेलले बताए ।

यसमध्ये अन्नपूर्ण होटलको नवीकरणको अवधि बाँकी रहेका कारण उसको कानुनी हैसियत बाँकी छ । साविकमा अन्नपूर्ण होटल रहेको स्थानमा ६ अर्ब रुपैयाँ लगानीमा २५ तलाको अन्नपूर्ण स्क्वायर होटल निर्माण सुरु गरिएको छ । जसमा भाटभटेनी, लिटिल एन्जल्स र अन्नपूर्ण समूहले लगानी गर्दैछन् । यो स्थानमा २०८५ सालदेखि नयाँ होटल सञ्चालनको योजना छ ।

फूलबारी र साङ्ग्रिला बन्द भएका कारण यी होटलले पाँचतारेको हैसियतमा कानुनी मान्यता नपाउने उनले बताए । कोभिड महामारीको संकटयता आतिथ्य सेवा प्रभावित भयो । त्यसपछि उठ्न नसकेका कतिपय होटलहरूले अझै सेवा सुरु गर्न सकेका छैनन् । तीन पाँचतारे होटलको इजाजत नवीकरण नभएको विभागले जनाएको छ । नयाँ बानेश्वरस्थित एभरेस्ट होटल, दरवारमार्गस्थित याक एन्ड यति र लाजिम्पाटस्थित र्‍याडिसन होटलले इजाजत नवीकरण गरेका छैनन् ।