लिपुलेक सीमा विवादमा भारतको स्पष्ट प्रतिक्रिया, ऐतिहासिक प्रमाण छैन भन्छ

मुख्य बुँदा

नेपालले लिपुलेक नाकाबाट सीमा व्यापार पुनः सुरु भएको विषयमा आपत्ति जनाएको थियो

भारतले नेपालको दाबी ऐतिहासिक प्रमाण र यथार्थमा आधारित नभएको बताएको

लिपुलेक नाकाबाट सीमा व्यापार १९५४ देखि निरन्तर चलिरहेको

कोभिड र अन्य कारणले रोकिएको व्यापार दुवै पक्षको सहमतिमा पुनः सुरु

भारतले नेपालसँग बाँकी सीमासम्बन्धी मुद्दा समाधान गर्न संवाद र कूटनीति मार्फत सकारात्मक काम गर्न तयार रहेको

काठमाडौं, ५ भाद्र । लिपुलेक नाकाबाट भारत र चीनबीच पुनः सुरु गरिएको सीमा व्यापारबारे नेपालको आपत्तिमा भारतले ऐतिहासिक प्रमाण र यथार्थमा आधारित नभएको बताएको छ। नेपालको धारणा प्रति प्रतिक्रिया दिँदै भारतको विदेश मन्त्रालयका प्रवक्ता रणधीर जैसवालले ऐतिहासिक प्रमाण र यथार्थमा आधारित नभएको बताएका हुन्।

उनले भने, ‘भारत र चीनबीच लिपुलेक नाकाबाट हुने सीमा व्यापार १९५४ मा सुरु भएको हो र दशकौंदेखि निरन्तर चलिरहेको छ। कोभिड महामारी र अन्य कारणले केही समय रोकिएको यो व्यापार दुवै पक्षको सहमतिमा पुनः सुरु गरिएको हो।’

नेपालले हालै यो व्यापार पुनः सुरु गरिएको विषयमा चासो व्यक्त गर्दै आफ्नो धारणा सार्वजनिक गरेको थियो। तर, भारतले यस्ता दाबीहरूलाई अस्वीकार गर्दै यसलाई ऐतिहासिक प्रमाण र यथार्थमा आधारित नभएको बताएको छ।प्रवक्ता जैसवालले थपे, ‘भू–भागसम्बन्धी कुनै पनि एकपक्षीय, कृत्रिम दाबी स्वीकार्य हुँदैन। यस्ता दाबीहरू न त न्यायसंगत छन्, न त ऐतिहासिक तथ्यहरूमै आधारित छन्।’

भारतले नेपालसँग बाँकी रहेका सीमासम्बन्धी मुद्दाहरू समाधान गर्न संवाद र कूटनीतिमार्फत् सकारात्मक रुपमा काम गर्न तयार रहेको पनि प्रवक्ताले बताएका छन्।