- २९ श्रावण २०८३, शुक्रबार / Aug 14, 2026
तेल अभिभ, ३१ जेठ । इरानले शुक्रबार राति इजरायलमाथि गरिएको ब्यालिस्टिक मिसाइल आक्रमणमा कम्तीमा ४० जना घाइते भएका छन् भने २ जनाको अवस्था गम्भीर रहेको छ।
इरानले आफ्नो राजधानी तेहरानमा भएका इजरायली हमलाको प्रतिशोधस्वरूप इजरायलमाथि ठूलो संख्यामा मिसाइल प्रहार गरेको हो। ‘ट्रू प्रमिस ३’ नाम दिइएको यस अपरेशन अन्तर्गत तेल अभिभ र जेरुसलेम क्षेत्रमा विस्फोटको आवाज सुनिएको थियो, र सम्पूर्ण इजरायलभरि साइरन बजाइएको थियो।
इरानी सर्वोच्च नेता अली खामेनीले इजरायली आक्रमणलाई “युद्धको सुरुआत” भन्दै कडा चेतावनी दिएका छन्। इजरायली सेनाका प्रवक्ता अविचाय अड्रायीका अनुसार, इरानले दुई चरणमा करीब १०० वटा मिसाइल प्रक्षेपण गरेको थियो, जसको अधिकांशलाई अवरोध गरिएको जनाइएको छ।
आक्रमणपछि इचिलोभ अस्पतालमा १८ जना, बेलिन्सन अस्पतालमा ७ जना, र शेबा अस्पतालमा १५ जना घाइतेको उपचार भइरहेको छ। तीमध्ये दुई जना गम्भीर अवस्थामा छन्। केही घाइतेलाई छर्रा लागेका छन् भने केहीलाई धुवाँ र मानसिक आघातका कारण समस्या भएको बताइएको छ।
घटनामा केही भवनहरूमा क्षति भएको पुष्टि गरिएको छ। क्षतिको मुख्य कारण अवरोध हुँदा छुटेका छर्रा र विस्फोटको असर रहेको बताइएको छ। यस हमलाले इरान–इजरायलबीचको तनाव चरम बिन्दुमा पुगेको संकेत दिएको छ, जसले क्षेत्रीय स्थायित्वमा गम्भीर असर पार्न सक्ने सुरक्षा विश्लेषकहरू बताउँछन्।
