होर्मुज स्ट्रेट बन्द गर्ने इरानको चेतावनी, अमेरिका–इरान तनाव थप चुलियो

मुख्य बुँदा

इरानले होर्मुज स्ट्रेट बन्द गर्ने चेतावनी दिएको

अमेरिकी आक्रमण भएमा रणनीतिक प्रतिक्रिया दिने घोषणा

इजरायल र अमेरिकी साझेदारहरू पनि निशानामा पर्ने

विदेशमन्त्रीले स्ट्रेट हाल बन्द नभएको स्पष्ट पारे

राष्ट्रपति पेजेस्कियानले अमेरिकी धम्कीको विरोध गरे

विश्वको २०% तेल आपूर्ति हुने मार्ग भएकाले बजारमा असर

तनाव बढ्दा अन्तर्राष्ट्रिय इन्धन मूल्य प्रभावित हुने सम्भावना

काठमाण्डौ, ९ फागुन । अमेरिकी राष्ट्रपति डोनाल्ड ट्रम्पले दिएको २४ घण्टे अल्टिमेटमको बीचमा इरानको शक्तिशाली सैन्य दस्ता इस्लामिक रिभोलुसनरी गार्ड कप्र्सले कडा चेतावनी दिएको छ ।

यदि अमेरिकाले इरानका ऊर्जा केन्द्र वा पावर प्लान्टहरूमा आक्रमण गरेमा रणनीतिक रूपमा महत्त्वपूर्ण मानिने ‘होर्मुज स्ट्रेट’ पूर्ण रूपमा बन्द गरिने इरानले घोषणा गरेको छ । गार्डले इरानी सञ्चारमाध्यममार्फत जारी गरेको वक्तव्यमा भनिएको छ, “यदि इरानको ऊर्जा संरचनामा हमला भयो भने होर्मुज स्ट्रेट तबसम्म खोलिने छैन, जबसम्म ध्वस्त भएका पावर प्लान्टहरू पुनर्निर्माण हुँदैनन्।”

साथै इरानले जवाफी कारबाही स्वरूप इजरायलका पावर प्लान्ट, ऊर्जा केन्द्र तथा सूचना प्रविधि क्षेत्रमा व्यापक आक्रमण गर्ने चेतावनी पनि दिएको छ । अमेरिकी साझेदारी भएका कम्पनीहरू र अमेरिकी सैन्य अखडा रहेका देशका पावर प्लान्टहरू पनि आफ्नो लागि वैध निशाना हुने इरानको दाबी छ ।

तर इरानका विदेशमन्त्री अब्बास अराग्चीले हाल होर्मुज स्ट्रेट आधिकारिक रूपमा बन्द नभएको स्पष्ट पारेका छन् । सामाजिक सञ्जाल ‘एक्स’ मा उनले लेख्दै भनेका छन्, “होर्मुज स्ट्रेट बन्द छैन। यस मार्गबाट जहाजहरू चल्न हिचकिचाउनुको कारण तेलका जहाजहरूको बीमा गर्ने कम्पनीहरूमा फैलिएको डर हो।” उनले अमेरिका र इजरायलले सुरु गरेको ‘वार अफ च्वाइस’ का कारण तनाव बढेको आरोप समेत लगाए ।

त्यस्तै, इरानका राष्ट्रपति मसूद पेजेस्कियानले पनि अमेरिकी धम्कीको कडा प्रतिवाद गरेका छन् । उनले इरानलाई नक्साबाट मेटाउने कुरा गर्नेहरूले देशको ऐतिहासिक शक्तिलाई नबुझेको टिप्पणी गरेका छन् । “धम्की र आतंकले हाम्रो एकता झन् मजबुत बनाउँछ,” उनले भनेका छन् ।

विश्वको करिब २० प्रतिशत तेल आपूर्ति हुने होर्मुज स्ट्रेटमा अवरोध भएमा अन्तर्राष्ट्रिय बजारमा इन्धनको मूल्यमा ठूलो वृद्धि हुने विश्लेषण गरिएको छ । यही सन्दर्भमा ट्रम्पले २१ मार्चमा ४८ घण्टे अल्टिमेटम दिँदै इरानको ठूलो पावर प्लान्ट ध्वस्त पार्ने चेतावनी दिएका थिए ।