झापामा जंगली हात्तीको आक्रमणबाट ६२ वर्षीया महिलाको मृत्यु

काठमाडौं,३१ जेठ । झापाको मेचीनगर नगरपालिका–४ मा जंगली हात्तीको आक्रमणबाट एक महिलाको मृत्यु भएको छ। जिल्ला प्रहरी कार्यालय झापा का प्रहरी निरीक्षक विजय चौहान का अनुसार स्थानीय ६२ वर्षीया पद्मा पौडेल को आज बिहान हात्तीको आक्रमणबाट ज्यान गएको हो।

प्रहरीका अनुसार बिहान घरबाट बाहिर निस्कने क्रममा उहाँमाथि हात्तीले आक्रमण गरेको थियो। घटनास्थलमै गम्भीर घाइते भएकी पौडेलको मृत्यु भएको जनाइएको छ।

मृतकको शव परीक्षणका लागि मेची प्रादेशिक अस्पताल मा राखिएको प्रहरीले जनाएको छ। घटनाबारे थप अनुसन्धान भइरहेको छ।