- ३ आश्विन २०८३, शनिबार / Sep 19, 2026
भक्तपुर । गुण्डू बृहत् खानेपानी तथा सरसफाइ उपभोक्ता समितिले शुद्ध खानेपानीको एक घर एक धारा अवधारणालाई यही वर्ष सम्पन्न गर्ने गरी नवनिर्वाचित कार्यसमितिलाई सपथ खुवाएको छ ।
बुधबार सूर्यविनायक नगरपालिका वडा नं ७ मा शपथ ग्रहण कार्यक्रम आयोजना गरी प्रमुख निर्वाचन अधिकृत गोविन्द प्रसाद चौलागाइँ, किरण न्यौपानेले नवनिर्वाचित कार्यसमितिलाई सपथ ग्रहण गराएका हुन ।
कार्यक्रममा नगर प्रमुख बासुदेव थापाले नवनिर्वाचित अध्यक्ष सरिता कुंवरसहितका पदाधिकारी एवं कार्यसमितिलाई प्रमाणपत्र वितरण गरे । नगरबासीलाई खानेपानीको पहुँचमा पुर्याउन आफुसहित सिंगो कार्यपालिका सदस्य लागिपरेको भन्दै प्रमुख बासुदेव थापाले १ देखि ६ वडा सम्मका वडाबासीलाई मेलम्चीको खानेपानी खुवाउन ८ करोड बजेट छु्टयाएर बताए ।
खानेपानी वितरणको काम अन्तिम चरणमा पुगेको भन्दै मेलम्चीको पानी अब छिटै वितरण हुने बताए । कार्यक्रममा नगर प्रवक्ता तथा वडा नंं ७ का वडाध्यक्ष रविन्द्र सापकोटाले नवनिर्वाचीत कार्यसमितिलाई बधाई दिदै खानेपानीको समस्या रहेका घ्याम्पेडाँडालगायत तल्लो क्षेत्रका वस्तीमा छिटै खानेपानी दिने गरी काम थाल्न आग्रह गर्दै नयाँ कार्यसमितिको जिम्मेवारी बढेको धारणा राखे ।
खानेपानी तथा सरसफाई उपभोक्ता समितिको चुनावबाट २७ वर्षपछि नयाँ नेतृत्वमा महिला निर्वाचित भएर आएका हुन । स्थानीय तह चुनावको झल्को दिने गरी प्रतिष्पर्धा भएको उक्त निर्वाचनबाट जिल्ला समन्वय समिति भक्तपुरका पूर्व उपप्रमुख सरिता कुँवर नयाँ नेतृत्वमा आएकी हुन । यो क्षेत्र नेकपा एमाले पोलिटव्यूरो सदस्य एवम् भक्तपुर जिल्ला इन्चार्ज महेश बस्नेतको गृह क्षेत्र हो ।
