- २८ श्रावण २०८३, बिहीबार / Aug 13, 2026
काठमाडौं । कैलालीको चिसापानीस्थित कर्णाली नदीमा पुलबाट हाम फालेका १७ जना युवामध्ये एक जना वेपत्ता भएका छन् । लम्कीचुहा नगरपालिका ३ चिसापानीका युवाको समूह दिउँसो सँगै होली खेलेर साँझ करिब ५ बजे नुहाउन पुलबाट हाम फालेको ईलाका प्रहरी कार्यालय चिसापानीले जनाएको छ ।
मदिरा सेवन गरी नाङ्गै हिँडेका युवालाई प्रहरीले रोक्न खोज्दा पुलमा तस्बिर खिच्ने बताउँदै अटेर गरी गएको र हाम फालेको जनाइएको छ । एकपछि अर्को हाम फालेकामध्ये एकजना डुबेर बेपत्ता भएका छन् ।
बेपत्ता हुनेमा लम्कीचुहा नगरपालिका ३ चिसापानीका ३० वर्षीय लोकेन्द्र शाही हुन् । जनपद प्रहरी र सशस्त्र प्रहरीले घटनाको बारेमा खोजी अनुसन्धान गरिरहेको छ ।
आज गोताखोर टोलीले वेपत्ता शाहीको खोजी गर्ने ईलाका प्रहरी कार्यालय चिसापानीले जनाएको छ । गत बर्ष पनि पुलबाट हाम फालेर पौडिने होडबाजीमा डुबेर एक युवाको निधन भएको थियो ।
