- २६ असार २०८३, शुक्रबार / Jul 10, 2026
सुर्खेत, १८ असार । कर्णाली प्रदेश सामाजिक विकास मन्त्रालय तथा शिक्षा विकास निर्देशनालय, सुर्खेतको आयोजनामा २०८२ असार १६ र १७ गते आयोजित ‘सार्वजनिक शिक्षा सुधार तथा उत्कृष्ट शिक्षक सम्मान कार्यक्रम’ भव्य रूपमा सम्पन्न भएको छ।
कार्यक्रममा कर्णाली प्रदेशका १० जिल्लाबाट छनोट गरिएका ३० जना उत्कृष्ट शिक्षकहरूलाई सम्मान गरिएको हो। उक्त सूचीमा दैलेख जिल्लाका दुई शिक्षकहरूले विशेष स्थान ओगट्न सफल भएका छन्। आठबीस नगरपालिका–९ स्थित पशुपति मावि छेपाडीका प्रधानाध्यापक टेक बहादुर सिजापति र चामुण्डा विन्द्रासैनी नगरपालिका अन्तर्गत हिमालय मावि तिजको डाँडाका प्रधानाध्यापक हर्क विक उत्कृष्ट शिक्षकको रूपमा सम्मानित हुनु भएकाे हाे।
स्थानीय निकायको सहकार्य र प्रदेश सरकारको पहलमा शिक्षकको मनोबल उच्च बनाउन उक्त कार्यक्रममा प्रदेश सरकारका उच्च पदस्थ अधिकारीहरू, शिक्षा विकास निर्देशनालयका प्रतिनिधिहरू, नगरपालिका शिक्षा शाखा, विद्यालय व्यवस्थापन समिति, शिक्षक अभिभावक संघ तथा स्थानीय समुदायका प्रतिनिधिहरूको उपस्थिति रहेकाे थियो।
शिक्षकहरूलाई ताम्रपत्र, प्रमाणपत्र र सम्मानपत्रसहित पुरस्कृत गरिएको हो। सम्मानित हुँदै पशुपति मावि छेपाडीका प्रधानाध्यापक टेक बहादुर सिजापतिले पनि सबैलाई धन्यवाद दिँदै भन्नुभयाे “सार्वजनिक शिक्षाको गुणस्तर सुधारमा निरन्तर प्रतिबद्ध छु। यो सम्मानले झन् धेरै काम गर्न हौसला दिएको छ।”
हिमालय मावि तिजको डाँडाका प्रधानाध्यापक हर्क विकले भन्नुभयाे “यो सम्मान विद्यालय, समुदाय र सम्पूर्ण शैक्षिक परिवारको सामूहिक प्रयासको प्रतिफल हो। अझ मेहनतपूर्वक काम गर्न उत्प्रेरणा मिलेको छ।”
