- २९ श्रावण २०८३, शुक्रबार / Aug 14, 2026
काठमाण्डौ । आज काठमाण्डौ उपत्यकामा यसवर्षकै न्यूनतम तापक्रम मापन गरिएको छ । आज बिहान काठमाण्डौको न्यूनतम तापक्रम १० दशमलव १ डिग्री सेल्सियसमा झरेको जल तथा मौसम पूर्वानुमान महाशाखाले जनाएको छ ।
हिजो उपत्यकाको तापक्रम ११ डिग्री सेल्सियस मापन भएको थियो । आज बिहानको तुलनामा तापक्रम १ डिग्रीले घटेको छ । महाशाखाका अनुसार आज काठमाण्डौको तापक्रम १० देखि १२ डिग्री सेल्सियसको दायरामा रहनेछ ।
त्यस्तै, देशकै उच्च चिसो स्थान जुम्लामा आज बिहानको न्यूनतम तापक्रम माइनस २.४ डिग्री सेल्सियस मापन गरिएको छ । आजै जुम्लाको तापक्रम माइनस ३ डिग्री सेल्सियससम्म झर्न सक्ने अनुमान गरिएको छ ।
देशका धेरै भागमा बिहान र बेलुका चिसो बढ्दै गएको छ । दिउँसो घाम लागे पनि रातको तापक्रम औसतभन्दा २ देखि ४ डिग्री सेल्सियस तल झर्ने सम्भावना रहेको महाशाखाको भनाइ छ ।
विपद् तथा जलवायू विज्ञ डा. धर्मराज उप्रेतीले चिसो बढ्दै गएको भन्दै जनस्वास्थ्यमा असर पर्न नदिन न्यानो लुगा लगाउन र चिसोबाट जोगिन सर्वसाधारणलाई सुझाव दिएका छन् ।
महाशाखाका अनुसार हाल देशभर कुनै ठूला मौसमी प्रणालीको प्रभाव छैन । अहिले कोशी, गण्डकी र कर्णाली प्रदेशका पहाडी–हिमाली भागमा आंशिक बदली छ भने बाँकी क्षेत्रहरूमा मौसम सफा रहेको छ ।
दिउँसो पनि कोशी र गण्डकीका पहाडी भागमा आंशिक बदली रहने र बाँकी भागमा मौसम मुख्यतया सफा रहने अनुमान गरिएको छ ।
