- २६ असार २०८३, शुक्रबार / Jul 10, 2026
काठमाण्डौ, २५ कार्तिक । सरकारले भू–उपयोग नियमावली, २०७९ लाई तेस्रो पटक संशोधन गरेसँगै देशभर कित्ताकाट खुला भएको छ । हिजो बसेको मन्त्रिपरिषद्को बैठकले तेस्रो संशोधित नियमावली स्वीकृत गरेपछि रोकिएको कित्ताकाट पुनः सञ्चालनमा आएको हो ।
पालिकाले जग्गा वर्गीकरण नगरेकाले देशभरका करिब ५ सय पालिकामा कित्ताकाट रोकिएको थियो । भू–उपयोग नियमावली जारी भएको तीन वर्ष बितिसक्दा पनि देशभरका ७५३ स्थानीय तहमध्ये केवल २५३ पालिकाले मात्र जग्गाको पूर्ण वर्गीकरण पूरा गरेका छन् ।
सरकारले २०८१ भदौ २७ मा नियमावली दोस्रो पटक संशोधन गर्दै पालिकालाई २०८२ असार मसान्तसम्मको समयसीमा दिएको थियो । तर सो अवधिमा पनि धेरै पालिकाले वर्गीकरण प्रक्रिया सम्पन्न नगरेकाले पुनः संशोधन गर्नुपरेको हो ।
सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलका अनुसार मन्त्रिपरिषद्को पछिल्लो बैठकले भू–उपयोग तेस्रो संशोधन नियमावली, २०८२ स्वीकृत गरेको छ । त्यस्तै, बैठकले राष्ट्रिय परिचय पत्र तथा पञ्जीकरण दोस्रो संशोधन नियमावली, २०८२ पनि स्वीकृत गरेको छ । अब व्यक्तिगत घटना दर्तामा भएका नाम, जन्ममिति, बसाईँसराइ, विवाह दर्ता जस्ता विवरणहरू एकपटकका लागि सच्चाउन सकिने भएको छ ।
गत भदौ २३ र २४ गतेका घटनासम्बन्धी जाँचबुझ आयोगमा निजामत तर्फका ४ जना र नेपाल प्रहरी तर्फका ११ जना गरी १५ जना कर्मचारी थप गर्ने निर्णय पनि बैठकले गरेको छ ।
यस्तै, भोलिदेखि २८ गतेसम्म भारतको नयाँ दिल्लीमा हुने नेपाल–भारत कोर्डिनेशन नवौं बैठकमा सशस्त्र प्रहरी बलका महानिरीक्षक राजु अर्यालको संयोजकत्वमा नेपाली प्रतिनिधि मण्डललाई सहभागिता स्वीकृत गरिएको छ ।
सरकारले आगामी फागुन १ गतेदेखि ७ गतेसम्म कर्णाली प्रदेशमा दशौं राष्ट्रिय खेलकुद प्रतियोगिता आयोजना गर्न स्वीकृति दिएको पनि प्रवक्ता खरेलले जानकारी दिए ।
