- ५ असार २०८३, शुक्रबार / Jun 19, 2026
काठमाडौं, २८ मंसिर । काठमाडौं उपत्यकासहित देशका विभिन्न भू–भागमा चिसो बढ्दै गएको छ। आज बिहान पौने ६ बजेको मापनअनुसार काठमाडौं उपत्यकाको न्यूनतम तापक्रम ५ दशमलव ४ डिग्री सेल्सियसमा झरेको जल तथा मौसम विज्ञान विभागको मौसम पूर्वानुमान महाशाखाले जनाएको छ।
महाशाखाका अनुसार आज कोशी, बागमती र गण्डकी प्रदेशका पहाडी भू–भागमा आंशिक बदलीको सम्भावना रहेको छ भने बाँकी भू–भागको मौसम मुख्यतया सफा रहनेछ। आज राति भने गण्डकी, लुम्बिनी, कर्णाली र सुदूरपश्चिम प्रदेशमा आंशिक बदलीको सम्भावना रहेको जनाइएको छ।
हाल नेपालमा पश्चिम वायूको आंशिक प्रभाव कायम रहेको महाशाखाले जनाएको छ। आज काठमाडौं उपत्यकाको अधिकतम तापक्रम १९ डिग्री सेल्सियससम्म पुग्ने अनुमान गरिएको छ।
यस्तै, देशकै चिसो क्षेत्रमध्ये एक हुम्लामा न्यूनतम तापक्रम माइनस १ दशमलव ८ डिग्री सेल्सियस मापन गरिएको छ। चिसो बढ्दै जाँदा सर्वसाधारणलाई आवश्यक सावधानी अपनाउन मौसमविद्हरूले आग्रह गरेका छन्।
