बस खोज्दा त्रिशूलीमा हराएको १९ केजीको चुम्बक नारायणीमा भेटियो

चितवन । त्रिशूली नदीमा खसेको बस खोजी गर्ने क्रममा हराएको भारतीय उद्धार टोलीको १९ केजी चुम्बक र लाइफ ब्वाइ ट्युब काभ्रेघाटस्थित नारायणी नदीमा फेला परेको छ । सिमलतालमा हराइरहेका बस खोज्न प्रयोग गरिएका दुई चुम्बकमध्ये १९ केजीको एउटा चुम्बक हराएको थियो । उक्त चुम्बक आज फेला परेको हो ।

असार २८ गते बिहान साढे ३ बजेतिर भरतपुर–२९ स्थित नारायणघाट मुग्लिन सडकको सिमलतालमा पहिरोले बगाएर वीरगन्जबाट काठमाडौं जाँदै गरेको एन्जल डिलक्स र काठमाडौंबाट गौरतर्फ जाँदै गरेको गणपति यातायातको यात्रुवाहक बस त्रिशूली नदीमा बेपत्ता भएका थिए ।

ती दुई बसमा ६५ यात्रु रहेकोमा तीन जनाले हाम फालेर ज्यान जोगाएका थिए । बससँगै हराइरहेका ६२ जनामध्ये अहिलेसम्म २५ जनाको मात्र शव फेला परेको छ । हराइरहेका ती बसहरूको खोजीमा सघाउन आएको भारतीय प्राविधिक टोली सोनार क्यामेरा, ठूला चुम्बकलगायत उपकरणबाट खोज्दा पनि केही पत्तो नलागेपछि हिजो फर्किसकेको छ । नेपाली सुरक्षाकर्मीले भने खोजतलास जारी राखेका छन् ।