- ५ असार २०८३, शुक्रबार / Jun 19, 2026
चितवन, १ मंसिर । पूर्वी चितवनको खैरहनीमा किसानहरूले आलुखेतीमा आधुनिक प्रविधिको प्रयोग बढाउँदै लैजाने क्रम तीव्र बन्न थालेको छ।
खैरहनी नगरपालिका–१० का किसान कृष्ण अर्यालले भारतबाट आधुनिक आलु रोप्ने औजार झिकेर यस वर्ष परीक्षणसँगै व्यावहारिक प्रयोगको शुरुवात गरेका छन्।
अर्यालका अनुसार परम्परागत तरिकाले मजदुर राखेर आलु रोप्दा १ कठ्ठामा करिब रु १,००० खर्चिन्थ्यो। तर नयाँ उपकरण प्रयोग गरेपछि १ बिघा ६ कठ्ठा क्षेत्रफल केवल ३ घण्टामा रोप्न सकिएको छ। सो कामको कुल खर्च रु ६,६०० मात्र परेको उनले बताए।
यस आधुनिक उपकरणले चारवटा लाइनमा मल र बीउ एकैपटक खसाल्ने सुविधा प्रदान गर्छ। अर्को किसान सीताराम अर्यालका अनुसार यन्त्रले एकपटकमा ४ क्विन्टल आलुका बीउ र १ क्विन्टल मल बोक्न सक्छ। बीउमा ४० देखि ५० ग्रामका एकनासे आलुका टुक्रा भए रोपाइँ झनै सहज हुन्छ।
किसानका अनुसार ठूलो क्षेत्रफलमा आलुखेती गर्नेहरूका लागि यो प्रविधि विशेष रूपमा उपयोगी बनेको छ। समय, श्रम र लागत तीनै पक्षमा हुने बचतले कृषि व्यवसायलाई थप आकर्षक र व्यावसायिक बन्न सहयोग पुगेको स्थानीय किसानहरूको बुझाइ छ।
