- २८ श्रावण २०८३, बिहीबार / Aug 13, 2026
भक्तपुर, ५ जेठ । भक्तपुर नगरपालिका वडा नं. ४ गःहिटीमा अवस्थित ऐतिहासिक लक्ष्मीनरसिंह मन्दिर अब उद्घाटनको अन्तिम तयारीमा पुगेको छ। भक्तपुर नगरपालिकाद्वारा पुनःनिर्माण गरिएको उक्त मन्दिरको उद्घाटन जेठ ६ गते बिहान ७ बजे हुने भएको हाे । मन्दिरकाे उद्घाटन नेपाल मजदुर किसान पार्टीका अध्यक्ष नारायणमान बिजुक्छेँले गर्नुहुने छ ।
नगरपालिकाले सम्पदा संरक्षण तथा सांस्कृतिक पुनर्जीवनको पहलस्वरूप यो मन्दिर पुनःनिर्माण गरेको हो। लामो समयदेखि जीर्ण अवस्थामा रहेको लक्ष्मीनरसिंह मन्दिरलाई परम्परागत शैली र सामग्रीको प्रयोग गर्दै पुनःनिर्माण गरिएको छ। स्थानीय काठ, इँटा, ढुंगा र कला-शिल्पको प्रयोगले मन्दिरमा मौलिकता कायम गरिएको छ।
नगरपालिकाले आयोजना गरेको कार्यक्रममा सम्पूर्ण भक्तजन, स्थानीय बासिन्दा, सरोकारवाला निकाय तथा संस्कृतिप्रेमीहरूलाई सहभागिताका लागि हार्दिक निमन्त्रणा गरिएको छ। उद्घाटनपछि विशेष पूजाआजा सहीतका कार्यक्रम सञ्चालन हुने बताइएको छ।
लक्ष्मीनरसिंह मन्दिर भक्तपुरको सांस्कृतिक र धार्मिक इतिहासमा महत्वपूर्ण सम्पदा हो। मन्दिरको पुनःनिर्माणले पुरातात्त्विक संरक्षणमा नगरपालिकाको सक्रियता झल्काएको छ।
