- ५ असार २०८३, शुक्रबार / Jun 19, 2026
मुख्य ५ बुँदा:
पर्खाल भत्किएपछि स्थानान्तरण
स्थानान्तरण विवरण
कैदीहरूलाई छलफलपछि सहमति
क्षमताभन्दा बढी भीड
पुनः ल्याइने योजना
काठमाडौं, ४ साउन । लमजुङको बेँसीसहरमा रहेको जिल्ला कारागारको गेट नजिकैको पर्खाल भत्किएपछि त्यहाँ रहेका १०२ कैदी थुनुवालाई अन्य जिल्लामा स्थानान्तरण गरिएको छ।
कारागारमा भौतिक तथा मानवीय जोखिम बढ्ने सम्भावनाका कारण कारागार व्यवस्थापन विभागको निर्णयअनुसार उनीहरूलाई तत्काल पुननिर्माण नभएसम्मका लागि अन्य कारागारमा सारिएको प्रमुख जिल्ला अधिकारी माधवप्रसाद पोखरेलले जानकारी दिनुभयो।
शनिबार नेपाल प्रहरी र सशस्त्र प्रहरीको सुरक्षा संयोजनमा तनहुँको दमौली कारागारमा ३० जना (महिला ६ सहित) र पोखरा कास्की कारागारमा ७८ जना कैदीलाई स्थानान्तरण गरिएको छ।
जिल्लामै बस्ने आग्रह गर्दै आएका कैदीहरूसँग लामो छलफलपछि लिखित प्रतिबद्धता गरी उनीहरू स्थानान्तरण हुन सहमत भएका थिए। कारागार प्रशासक बेनीबहादुर मुक्तानका अनुसार लमजुङ कारागारको करिब ३ मिटर अग्लो पर्खाल भत्किएको छ। ३५ जनाको क्षमता भएको कारागारमा हाल १०८ कैदी र थुनुवाहरू रहेका छन्।
विस २०२८ सालमा निर्माण भएको यो कारागार समय समयमा मर्मत हुँदै आएको भए पनि अहिले सम्म पूर्ण रूपमा मर्मत हुन सकेको थिएन। कारागार पुनर्निर्माणपछि कैदीहरूलाई पुनः लमजुङ ल्याउने योजना रहेको छ।
