- १ कार्तिक २०८३, आईतवार / Oct 18, 2026
काठमाडौं । प्रदेशहरुमा सबैभन्दा ठूलो आकारको बजेट प्रस्तुत गरेको बागमती प्रदेशले बजेट बढाएको छ। बागमतीले आगामी आवका लागि ६४ अर्ब ५४ करोड रुपैयाँको बजेट सार्वजनिक गरेको हो ।
बागमतीले चालु आवको तुलनामा करिब दुई अर्ब रुपैयाँले बढी हो। चालु आवमा बागमतीले ६२ अर्ब ७१ करोड रुपैयाँको बजेट सार्वजनिक गरेको थियो। सात वटै प्रदेशका आर्थिक मामिला तथा योजनामन्त्रीले शनिबार आआफ्नो प्रदेश सभामा प्रस्तुत गरेको बजेट चालु आवको तुलनामा घटाएर ल्याएका हुन्।
सातै प्रदेशको बजेटमध्ये बागमती र सुदूरपश्चिम प्रदेश सरकारबाहेक बाँकी सबै प्रदेशको बजेट घटेको पाइएको हो । गण्डकी प्रदेशले चालु आवको तुलनामा करिब एक अर्ब रुपैयाँ आकार घटाएर ३२ अर्ब ९६ करोड रुपैयाँको बजेट सार्वजनिक गरेको छ। चालु आवमा गण्डकी प्रदेशले ३३ अर्ब ८२ करोड रुपैयाँको बजेट ल्याएको थियो।
चालु आवमा ३६ अर्ब ७४ करोड रुपैयाँको बजेट ल्याएको कोशी प्रदेशले आगामी आवका लागि ८६ करोड घटाएर ३५ अर्ब २७ करोड रुपैयाँको बजेट सार्वजनिक गरेको छ। मधेश प्रदेशले पनि चालु आवको करिब २२ करोड रुपैयाँ घटाएर ४३ अर्ब ८९ करोड २१ लाख रुपैयाँको बजेट ल्याएको छ।
लुम्बिनी प्रदेशले चालु आवको तुलनामा डेढ अर्बले घटाएर ३८ अर्ब ९५ करोड ९५ लाख रुपैयाँको बजेट सार्वजनिक गरेको छ । आगामी आवका लागि सुदूरपश्चिम प्रदेश सरकारले आफ्नो बजेट बढाएर ३१ अर्ब ६२ करोड ९८ लाख रुपैयाँ पुर्याएको छ। चालु आवमा सुदूरपश्चिम सरकारले २९ अर्ब २६ करोड ५९ लाख रुपैयाँको बजेट ल्याएको थियो।
सबै भन्दा कम कर्णाली सरकारले दुई अर्बले बजेटको आकार घटाएर ३१ अर्ब ४१ करोड ४१ हजार रुपैयाँको बजेट ल्याएको छ। चालु आवमा कर्णालीले ३३ अर्ब ३७ करोड रुपैयाँको बजेट सार्वजनिक गरेको थियो।
