- ३० असार २०८३, मंगलवार / Jul 14, 2026
जनकपुरधाम, १७ मंसिर । मधेश प्रदेशका मुख्यमन्त्री सरोज कुमार यादवले विश्वासको मत लिन बोलाइएको प्रदेशसभा बैठक बस्न आज ढिला भइरहेकाे छ ।
बिहान ८ बजे बोलाइएको बैठक पौने १० बजेसम्म पनि सुरु हुन सकेको छैन । आज प्रदेश सभा भवन परिसर तथा आसपासमा सुरक्षा व्यवस्था कडा बनाइएको छ ।
बैठक बस्नुअघि तालिमप्राप्त कुकुरमार्फत सुरक्षा जाँच गरिएको प्रदेश सभा सचिवालयका सुरक्षा इन्चार्ज प्रहरी निरीक्षक विक्रम शाहले जानकारी दिए । सुरक्षा उपकरणहरू जेनजी आन्दोलनका क्रममा जलाइएपछि यस्तो जाँच प्रक्रिया अपनाइएको हो । यसअघि पूर्वमुख्यमन्त्री जितेन्द्र सोनलले विश्वासको मत लिने दिनमा पनि यस्तो उच्च स्तरको सुरक्षा जाँच गरिएको थियो ।
सर्वोच्च अदालतले मंसिर १५ गते २४ घण्टाभित्र विश्वासको मत लिन परमादेश जारी गरेपछि मुख्यमन्त्री यादव आज बहुमत परीक्षणका लागि प्रदेश सभामा उपस्थित हुन लागेका हुन् । संविधानको धारा १६८(२) अनुसार सात दलको गठबन्धनबाट मुख्यमन्त्री बनेका सोनलले गत कात्तिक २२ गते बहुमत नपाउने अवस्था बनेपछि राजीनामा दिएका थिए । तत्कालीन प्रदेश प्रमुख सुमित्रा सुवेदी भण्डारीले संविधानको धारा १६८(३) बमोजिम सबैभन्दा ठूलो दल एमालेका नेता सरोज यादवलाई कात्तिक २४ गते मुख्यमन्त्री नियुक्त गरेकी थिइन् ।
भण्डारीले उपचारका लागि काठमाडौं जाँदैछु भनेर मधेश भवनबाट निस्किए पनि बर्दिबासको एक होटेलमा बिहानै यादवलाई शपथ खुवाएको घटना विवादित बनेको थियो । सो मुद्दामा रिट दायर भएपछि सर्वोच्चले आजै विश्वासको मत लिन आदेश दिएको हो ।
