- २६ असार २०८३, शुक्रबार / Jul 10, 2026
तराई–मधेशमा साउनको दोश्रो साता पुगेर मात्र रोपाइँ सुरु
खडेरीपछि आएको पानीले रोपाइँमा तीव्रता
छिटो पाक्ने जातहरू छनोट गर्न विज्ञको सल्लाह
हालसम्म मधेशमा ५८% र देशभर ८४% रोपाइँ सम्पन्न
रोपाइँमा ढिलाइले उत्पादन लक्ष्यमा असर पर्ने सम्भावना
काठमाडौँ, १९ साउन । लामो खडेरीपछि तराई–मधेश क्षेत्रमा पानी परेपछि किसानहरू धान रोपाइँमा व्यस्त बनेका छन्। केही समयअघिसम्म सुक्खा संकट झेलिरहेका मधेश प्रदेशका किसानले पानीको आगमनसँगै ढिलो भए पनि राहत पाएका छन्।
विगतमा मध्य साउनसम्म रोपाइँको काम पूरा भइसकेको हुने मधेशमा यसपटक भने साउनको दोस्रो साता पार भएपछि मात्र रोपाइँ सुरु भएको हो। शनिवारदेखि परेको वर्षाले अहिले धमाधम रोपाइँ सुरु भएको छ।
यद्यपि, ढिलो रोपाइँले धानको बीउको छनोट र जनशक्ति व्यवस्थापन किसानका लागि चुनौती बनेको कृषि विज्ञहरू बताउँछन्। धानबाली विज्ञ डा. उज्जवलकुमार सिंह कुशवाहाका अनुसार, समय बचतका लागि किसानहरूले अब छिटो पाक्ने धान जातहरू छान्नुपर्छ। उनले सिफारिस गरेका प्रमुख धान जातहरू:
हर्दिनाथ–१, ३, ५
चैते–२, ५
सुख्खा धान–३, ५, ६
बासमती धान: शुद्धोधन कालानमक, लल्का बासमती
कृषि तथा पशुपन्छी विकास मन्त्रालयका अनुसार मधेशमा हालसम्म ५८ प्रतिशत मात्र रोपाइँ सम्पन्न भएको छ। देशभर हालसम्म ८४ प्रतिशत रोपाइँ सम्पन्न भएको मन्त्रालयको तथ्यांकमा उल्लेख छ।
यस वर्ष १३ लाख ७८ हजार हेक्टर क्षेत्रफलमा रोपाइँ हुने अनुमान गरिएको छ, जसमध्ये ११ लाख ५६ हजार हेक्टरमा रोपाइँ सम्पन्न भइसकेको छ।
